ఆశా వర్కర్లు, అంగన్‌వాడీ సిబ్బందికి ఘన సన్మానం
తూప్రాన్ మండలం, అక్టోబర్ 6 (తెలుగు ట్రెండ్స్): బీజేపీ చేపట్టిన ‘సేవా సంకల్ప అభియాన్’ కార్యక్రమంలో భాగంగా తూప్రాన్ మండలంలోని కిష్టాపూర్, ఇస్లాంపూర్, గుండ్రెడ్డిపల్లి, దాతర్పల్లి గ్రామాల్లో ఆశా వర్కర్లు, అంగన్‌వాడీ టీచర్లు, కార్యకర్తలను బీజేపీ నాయకులు ఘనంగా సన్మానించారు. గ్రామీణ ప్రాంతాల్లో ప్రజల ఆరోగ్య పరిరక్షణతో పాటు చిన్నారులు, గర్భిణుల సంక్షేమం కోసం నిరంతరం సేవలందిస్తున్న సిబ్బందిని గుర్తించి ఈ సన్మాన కార్యక్రమాన్ని నిర్వహించారు.
ఈ కార్యక్రమానికి తూప్రాన్ మండల బీజేపీ అధ్యక్షులు పిట్ల పోచయ్య ముదిరాజ్ ముఖ్య అతిథిగా హాజరయ్యారు. సన్మాన గ్రహీతలకు శాలువాలు కప్పి, పూలమాలలు వేసి ఆత్మీయంగా సత్కరించారు. ఈ సందర్భంగా ఆయన మాట్లాడుతూ గ్రామీణ ప్రాంతాల్లో ఎలాంటి లాభాపేక్ష లేకుండా ప్రజలకు నిరంతరం సేవలందిస్తున్న ఆశా వర్కర్లు, అంగన్‌వాడీ టీచర్లు, కార్యకర్తల సేవలు అభినందనీయమన్నారు. ప్రజారోగ్య పరిరక్షణలో వారు కీలక పాత్ర పోషిస్తున్నారని తెలిపారు.
కరోనా వంటి కష్టకాలంలోనూ ఆశా వర్కర్లు, అంగన్‌వాడీ సిబ్బంది తమ సేవలను కొనసాగిస్తూ గ్రామాల్లో ప్రజలకు ఆరోగ్య సంబంధిత అవగాహన కల్పించారని పిట్ల పోచయ్య ముదిరాజ్ పేర్కొన్నారు. క్షేత్రస్థాయిలో పనిచేస్తూ ప్రజలకు అందుబాటులో ఉండే ఇలాంటి సేవా కార్యకర్తలను గౌరవించుకోవడం గర్వకారణమన్నారు. సమాజ సేవలో ముందుండే ప్రతి ఒక్కరినీ గుర్తించి ప్రోత్సహించడమే ‘సేవా సంకల్ప అభియాన్’ ప్రధాన ఉద్దేశమని తెలిపారు.
మోదీ నాయకత్వంలో బీజేపీ శ్రమజీవులకు, సేవా దృక్పథంతో పనిచేసే వారికి అండగా ఉంటుందని ఆయన అన్నారు. గ్రామీణ ప్రాంతాల్లో ప్రజలకు అందుతున్న సేవలను మరింత బలోపేతం చేయాల్సిన అవసరం ఉందని పేర్కొన్నారు.
ఈ కార్యక్రమంలో బీజేపీ మండల, జిల్లా కిసాన్ మోర్చా కార్యవర్గ సభ్యులు శ్రీనివాస్ రెడ్డి, మండల ఎస్సీ మోర్చా నాయకులు యాదగిరి, శక్తి కేంద్రం ఇన్‌చార్జ్ కుంట రాజు, బూత్ అధ్యక్షులు జోడు నవీన్, కరుణాకర్, సందీప్ తదితరులు పాల్గొన్నారు.
