గణేష్ నిమజ్జనం.. గల్లంతైన గణేష్
హల్దీ ప్రాజెక్టు కాల్వలో ప్రమాదవశాత్తు జారిపడిన వ్యక్తి.. గజ ఈతగాళ్లతో ముమ్మరంగా గాలింపు
మాసాయిపేట, సెప్టెంబర్ 24 (తెలుగు ట్రెండ్స్):
మాసాయిపేట మండల కేంద్రంలో గణేష్ నిమజ్జన వేడుకల్లో విషాదకర ఘటన చోటుచేసుకుంది. నిమజ్జన కార్యక్రమంలో పాల్గొన్న కమిండ్ల గణేష్ (40) ప్రమాదవశాత్తు హల్దీ ప్రాజెక్టు కాల్వలో జారిపడి గల్లంతయ్యాడు. గురువారం తెల్లవారుజామున సుమారు 3 గంటల సమయంలో ఈ ఘటన చోటుచేసుకున్నట్లు సమాచారం.
విషయం తెలుసుకున్న పోలీసులు, అగ్నిమాపక సిబ్బంది వెంటనే ఘటనాస్థలానికి చేరుకుని గాలింపు చర్యలు చేపట్టారు. గజ ఈతగాళ్లను రంగంలోకి దించి కాల్వలో గణేష్ ఆచూకీ కోసం ముమ్మరంగా గాలిస్తున్నారు. కాల్వలో నీటి ప్రవాహం, లోతు కారణంగా గాలింపు చర్యలకు ఆటంకాలు ఎదురవుతున్నట్లు తెలుస్తోంది.
గణేష్ గల్లంతైన విషయం తెలియడంతో కుటుంబ సభ్యులు, బంధువులు తీవ్ర ఆందోళనకు గురయ్యారు. ఇటీవలే గణేష్ తన చెల్లి వివాహాన్ని జరిపించినట్లు కుటుంబ సభ్యులు తెలిపారు. సంతోషంగా జరగాల్సిన గణేష్ నిమజ్జన వేడుకలో విషాద ఘటన చోటుచేసుకోవడంతో మాసాయిపేటలో విషాద ఛాయలు అలుముకున్నాయి.
గణేష్ ఆచూకీ కోసం పోలీసులు, అగ్నిమాపక సిబ్బంది గాలింపు చర్యలను కొనసాగిస్తున్నారు. కాల్వలో పరిస్థితులను దృష్టిలో ఉంచుకుని సహాయక చర్యలను ముమ్మరం చేశారు.
