కొత్తలింగాయిపల్లిలో ఘనంగా దుర్గామాతకు కుంకుమార్చన పూజలు
మహిషాసుర మర్దిని అవతారంలో దర్శనమిచ్చిన అమ్మవారు.. బారులు తీరిన భక్తులు
తెలుగు ట్రెండ్స్, పాపన్నపేట, అక్టోబర్ 19:
మెదక్ జిల్లా పాపన్నపేట మండల పరిధిలోని కొత్తలింగాయిపల్లిలో దేవీ శరన్నవరాత్రి ఉత్సవాలు భక్తిశ్రద్ధలతో కొనసాగుతున్నాయి. నవరాత్రి ఉత్సవాల్లో తొమ్మిదో రోజైన సోమవారం దుర్గామాతకు భక్తులు పెద్ద ఎత్తున హాజరై ఘనంగా కుంకుమార్చన పూజలు నిర్వహించారు. అమ్మవారు శ్రీ మహిషాసుర మర్దిని దేవి అవతారంలో భక్తులకు దర్శనమిచ్చారు.
ఈ సందర్భంగా అమ్మవారిని ప్రత్యేకంగా అలంకరించి పూజలు నిర్వహించారు. మండల పరిధిలోని వివిధ గ్రామాల నుంచి భక్తులు, మహిళలు ఉదయాన్నే ఆలయానికి చేరుకుని అమ్మవారిని దర్శించుకునేందుకు బారులు తీరారు. భక్తులు కుంకుమార్చనలో పాల్గొని అమ్మవారికి మొక్కులు చెల్లించుకున్నారు. కుటుంబాలు సుఖసంతోషాలతో ఉండాలని, ప్రజలందరికీ ఆయురారోగ్యాలు కలగాలని అమ్మవారిని ప్రార్థించారు.
దేవీ శరన్నవరాత్రి ఉత్సవాల సందర్భంగా కొత్తలింగాయిపల్లిలో భక్తి వాతావరణం నెలకొంది. అమ్మవారి దర్శనానికి భక్తులు పెద్ద సంఖ్యలో తరలిరావడంతో ఆలయ పరిసరాలు సందడిగా మారాయి. ఉత్సవాలను భక్తిశ్రద్ధలతో నిర్వహించారు.
ఈ కార్యక్రమంలో గ్రామ ఉత్సవ కమిటీ సభ్యులు, మహిళలు, భక్తులు తదితరులు పాల్గొన్నారు.
