ఉపాధి హామీ పనులను వేగవంతం చేయాలి
కొల్చారం, అక్టోబర్ 7, తెలుగు ట్రెండ్స్: మండలంలో ఉపాధి హామీ పథకం కింద చేపడుతున్న పనులను మరింత వేగవంతం చేసి, ఎక్కువ మంది కూలీలకు ఉపాధి కల్పించేలా చర్యలు తీసుకోవాలని డీఆర్‌డీఓ శ్రీనివాస్ రావు అధికారులను ఆదేశించారు. బుధవారం కొల్చారం మండల కేంద్రంలో మండలంలోని అన్ని గ్రామాల పంచాయతీ కార్యదర్శులు, వి.బి.-జీ రామ్‌జీ సిబ్బందితో ఆయన సమీక్ష సమావేశం నిర్వహించారు.
ఈ సందర్భంగా గ్రామాల వారీగా ఉపాధి హామీ పనుల పురోగతి, కూలీల హాజరు, చేపట్టిన పనులు, పూర్తయిన పనులు తదితర అంశాలపై అధికారులను అడిగి తెలుసుకున్నారు. రాబోయే రోజుల్లో ఉపాధి హామీ పనులను మరింత వేగవంతం చేసి కూలీల సంఖ్యను పెంచాలని సూచించారు. గ్రామాల్లో ఉపాధి కోరుకునే ప్రతి కూలీకి పనులు కల్పించేలా ప్రణాళికాబద్ధంగా చర్యలు చేపట్టాలని ఆదేశించారు.
అదేవిధంగా జలసిరికి సంబంధించిన పనుల పురోగతిపై కూడా సమీక్షించారు. ఆయా పనులను త్వరితగతిన పూర్తి చేసి ప్రజలకు వాటి ప్రయోజనాలు అందేలా చూడాలని అధికారులకు సూచించారు. పనుల అమలులో నాణ్యతా ప్రమాణాలను పాటిస్తూ, నిర్దేశిత సమయంలో పనులను పూర్తి చేయాలని ఆదేశించారు.
గ్రామస్థాయిలో చేపడుతున్న ఉపాధి హామీ పనులను అధికారులు, సిబ్బంది క్షేత్రస్థాయిలో పర్యవేక్షించాలని డీఆర్‌డీఓ సూచించారు. కూలీలకు ఎలాంటి ఇబ్బందులు లేకుండా అవసరమైన సౌకర్యాలు కల్పిస్తూ పనులు సక్రమంగా జరిగేలా చూడాలని పేర్కొన్నారు. ప్రభుత్వ లక్ష్యాలకు అనుగుణంగా పనుల పురోగతిని ఎప్పటికప్పుడు సమీక్షించాలని సూచించారు.
ఉపాధి హామీ పథకం ద్వారా గ్రామీణ ప్రాంతాల్లో కూలీలకు నిరంతరం పనులు అందేలా చర్యలు తీసుకోవాలని, పనుల వివరాలను ఎప్పటికప్పుడు నమోదు చేసి సంబంధిత రికార్డులను సక్రమంగా నిర్వహించాలని అధికారులకు సూచించారు. గ్రామాల్లో చేపట్టే పనులు ప్రజలకు ఉపయోగపడేలా ప్రాధాన్యత క్రమంలో పనులను ఎంపిక చేసుకోవాలని తెలిపారు.
ఈ సమీక్ష సమావేశంలో ఎంపీడీఓ, ఏపీఓ, టెక్నికల్ అసిస్టెంట్లు, మండలంలోని అన్ని గ్రామాల పంచాయతీ కార్యదర్శులు, ఫీల్డ్ అసిస్టెంట్లు, వి.బి.-జీ రామ్‌జీ సిబ్బంది తదితరులు పాల్గొన్నారు.
