ట్రాక్టర్‌ నుంచి పడి వ్యక్తి మృతి
ట్రాలీ టైరు మీదుగా వెళ్లడంతో తీవ్రగాయాలు.. ఘటనా స్థలంలోనే మృతి
పాపన్నపేట, అక్టోబర్ 13:(
 |
తెలుగు ట్రేండ్స్ )
ట్రాక్టర్‌పై నుంచి కిందపడి ట్రాలీ టైరు మీదుగా వెళ్లడంతో తీవ్రగాయాలపాలైన ఓ వ్యక్తి అక్కడికక్కడే మృతి చెందిన విషాద ఘటన మెదక్‌ జిల్లా పాపన్నపేట మండలం గాజులగూడెం గ్రామంలో చోటుచేసుకుంది. కుటుంబాన్ని పోషిస్తూ వ్యవసాయం చేసుకునే వ్యక్తి ప్రమాదంలో మృతి చెందడంతో గ్రామంలో విషాదఛాయలు అలుముకున్నాయి.
పాపన్నపేట ఎస్సై శ్రీనివాస్‌ గౌడ్‌ తెలిపిన వివరాల ప్రకారం.. గాజులగూడెం గ్రామానికి చెందిన పుట్టల సాయిలు (45) వ్యవసాయం చేసుకుంటూ కుటుంబాన్ని పోషించుకుంటున్నాడు. ఈ క్రమంలో సోమవారం సాయంత్రం అదే గ్రామానికి చెందిన ఇస్మాయిల్‌తో కలిసి ట్రాక్టర్‌ తీసుకురావడానికి మండల పరిధిలోని ఎన్కేపల్లికి వెళ్లాడు. అక్కడ ఓ ఇంటి వద్ద ట్రాక్టర్‌లో మట్టిని నింపుకొని రాత్రి సమయంలో తిరిగి గ్రామానికి బయలుదేరారు.
ట్రాక్టర్‌ను ఇస్మాయిల్‌ నడుపుతుండగా సాయిలు పక్కన కూర్చున్నాడు. వారు గ్రామం వెలుపలకు వస్తున్న సమయంలో ట్రాక్టర్‌పై నుంచి సాయిలు అదుపుతప్పి కిందపడిపోయాడు. ఈ క్రమంలో ట్రాలీకి ఉన్న టైరు అతనిపై నుంచి వెళ్లడంతో తీవ్రగాయాలయ్యాయి. దీంతో సాయిలు ఘటనా స్థలంలోనే ప్రాణాలు కోల్పోయాడు.
ప్రమాదం గురించి సమాచారం అందుకున్న కుటుంబ సభ్యులు ఘటనా స్థలానికి చేరుకొని సాయిలు మృతదేహాన్ని చూసి కన్నీరుమున్నీరయ్యారు. అనంతరం పోలీసులకు సమాచారం అందించారు. ఘటనాస్థలికి చేరుకున్న పోలీసులు ప్రమాదం జరిగిన తీరును పరిశీలించి వివరాలు సేకరించారు. మృతదేహాన్ని పోస్టుమార్టం నిమిత్తం మెదక్‌ జిల్లా ఆస్పత్రికి తరలించారు.
మృతుడు సాయిలు భార్య పోచమ్మ ఇచ్చిన ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై శ్రీనివాస్‌ గౌడ్‌ తెలిపారు. ప్రమాదానికి సంబంధించిన పూర్తి వివరాలను పోలీసులు విచారిస్తున్నారు.
