పస్కా పండుగ ప్రేమ, విముక్తి, పునరుత్థానానికి ప్రతీక
సత్యం, నిష్కపటత్వంతో జీవించాలి: డాక్టర్ శాంతయ్య
పాతూరు శివారులో మెదక్ సీఎస్‌ఐ చర్చి ఆధ్వర్యంలో పస్కా వేడుకలు
మెదక్, అక్టోబర్ 13: (తెలుగు ట్రేండ్స్ )
పస్కా పండుగ దేవుని రక్షణకు, విముక్తికి, యేసుక్రీస్తు త్యాగం, పునరుత్థానానికి ప్రతీకగా నిలుస్తుందని మెదక్ సీఎస్‌ఐ చర్చి ప్రెసిబిటర్ ఇన్‌చార్జి డాక్టర్ శాంతయ్య అన్నారు. అపొస్తలుడైన పౌలు బోధించినట్లుగా చెడు స్వభావాలను విడిచిపెట్టి, సత్యం, నిష్కపటత్వంతో కూడిన జీవితాన్ని కొనసాగించాలని పిలుపునిచ్చారు. మంగళవారం మెదక్ మండలం పాతూరు గ్రామ శివారులోని వ్యవసాయ క్షేత్రంలో మెదక్ సీఎస్‌ఐ చర్చి ఆధ్వర్యంలో పస్కా పండుగను భక్తిశ్రద్ధలతో నిర్వహించారు. ఈ సందర్భంగా డాక్టర్ శాంతయ్య దైవవాక్యాన్ని అందిస్తూ పస్కా పండుగ ప్రాధాన్యతను వివరించారు.
ఐగుప్తు దేశంలో బానిసత్వంలో కష్టాలు అనుభవిస్తున్న ఇశ్రాయేలీయులను దేవుడు మోషే నాయకత్వంలో విముక్తి చేసిన సంఘటన పస్కా పండుగకు ప్రధాన నేపథ్యమని ఆయన వివరించారు. దేవుని ఆజ్ఞ ప్రకారం ఇశ్రాయేలీయులు గొర్రెపిల్లను బలి అర్పించి, దాని రక్తాన్ని తమ ఇళ్ల ద్వారబంధాలపై పూశారని, ఆ రాత్రి వారి ఇళ్లను తీర్పు దాటిపోయిన అనంతరం వారు బానిసత్వం నుంచి విముక్తి పొందారని తెలిపారు. ఈ సంఘటన దేవుని రక్షణకు, విశ్వాసానికి, స్వేచ్ఛకు ప్రతీకగా నిలిచిందన్నారు.
యేసుక్రీస్తు మానవాళి రక్షణ కోసం సిలువపై తన ప్రాణాలను అర్పించి, మూడవ రోజున పునరుత్థానం పొందారని డాక్టర్ శాంతయ్య పేర్కొన్నారు. క్రీస్తు త్యాగం మానవాళికి పాపవిముక్తి సందేశాన్ని అందిస్తే, ఆయన పునరుత్థానం నూతన జీవితంపై ఆశను, నిరీక్షణను కలిగిస్తుందని వివరించారు. క్రీస్తు ప్రేమ, త్యాగం, క్షమాగుణం ప్రతి ఒక్కరికీ ఆదర్శంగా నిలవాలని అన్నారు.
సత్యం, నిష్కపటత్వంతో జీవించాలి
అపొస్తలుడైన పౌలు బోధించినట్లుగా పాత పులిసిన పిండిని తొలగించి, సత్యం, నిష్కపటత్వంతో కూడిన జీవితాన్ని కొనసాగించాలని డాక్టర్ శాంతయ్య సూచించారు. అసూయ, ద్వేషం, అబద్ధం, కపటం వంటి చెడు లక్షణాలను విడిచిపెట్టి స్వచ్ఛమైన మనస్సుతో జీవించాలన్నారు. పస్కా పండుగను కేవలం ఒక వేడుకగా కాకుండా, జీవితంలో మంచి మార్పునకు నాందిగా భావించాలని తెలిపారు.
యేసుక్రీస్తు బోధించిన ప్రేమ, శాంతి, క్షమాగుణాలను ప్రతి ఒక్కరూ తమ జీవితాల్లో ఆచరించాలని పిలుపునిచ్చారు. పేదలకు సహాయం చేయడం, ఆకలితో ఉన్నవారికి ఆహారం అందించడం, బాధల్లో ఉన్నవారికి అండగా నిలవడం ద్వారా మానవత్వాన్ని చాటాలని సూచించారు. పరస్పర ప్రేమాభిమానాలతో జీవిస్తూ సమాజంలో శాంతి, సోదరభావాన్ని పెంపొందించాలని సందేశమిచ్చారు.
చర్చి ప్రముఖులు, విశ్వాసులు హాజరు
ఈ కార్యక్రమంలో మెదక్ చర్చి వర్జర్ అయ్యగారు రెవ. డేవిడ్ రిచార్డ్స్, రెవ. జైపాల్, రెవ. శ్రీనివాస్, మెదక్ చర్చి కార్యదర్శి గేలన్ చిత్తరాంజన్, కోశాధికారి గంట సంపత్, పాస్టరేట్ స్టీవార్డు ప్రభుదాయ, చర్చి స్టీవార్డు దేవా ప్రకాష్, జయ్ మూర్రే, సువన్, సుశీల్, మాణిక్యారావు, సునీల్, సామ్యూల్ స్వరూప్, శాంసన్ సందీప్, వికాస్ తదితరులు పాల్గొన్నారు.
పస్కా వేడుకల విజయానికి కృషి చేసిన ప్రతి ఒక్కరికీ కృతజ్ఞతలు
పస్కా పండుగను విజయవంతంగా నిర్వహించేందుకు సహకరించిన చర్చి పెద్దలు, పాస్టర్లు, స్టీవార్డులు, విశ్వాసులు, ఇతరులందరికీ మెదక్ సీఎస్‌ఐ చర్చి కార్యదర్శి గేలన్ చిత్తరంజన్ కృతజ్ఞతలు తెలిపారు. కార్యక్రమం విజయవంతం కావడానికి సహకరించిన ప్రతి ఒక్కరి సేవలను అభినందిస్తూ, అందరి సహకారంతో పస్కా పండుగను ఆధ్యాత్మిక వాతావరణంలో నిర్వహించగలిగామని పేర్కొన్నారు.
పాతూరు గ్రామ శివారులోని వ్యవసాయ క్షేత్రంలో నిర్వహించిన పస్కా పండుగలో విశ్వాసులు పాల్గొని దైవవాక్యాన్ని ఆలకించారు. పస్కా పండుగ ప్రతి ఒక్కరి జీవితంలో నూతన ఆశలను నింపాలని, కుటుంబాల్లో ఆనందం, సమాజంలో శాంతి, ప్రేమ, సోదరభావం వెల్లివిరియాలని ఆకాంక్షించారు.
