దండుపల్లిలో పంచాయతీరాజ్ డిప్యూటీ కమిషనర్ పర్యటన
పారిశుద్ధ్య నిర్వహణ, గ్రామ పంచాయతీ రికార్డుల పరిశీలన.. చెత్త వేరు చేసే విధానంపై అధికారులకు సూచనలు
తెలుగు ట్రెండ్స్, మనోహరాబాద్: మెదక్ జిల్లా మనోహరాబాద్ మండలంలోని దండుపల్లి గ్రామంలో రాష్ట్ర పంచాయతీరాజ్ డిప్యూటీ కమిషనర్ జాన్ వెస్లీ శుక్రవారం పర్యటించారు. గ్రామ పంచాయతీలో అమలు చేస్తున్న పారిశుద్ధ్య నిర్వహణ విధానాలు, అభివృద్ధి కార్యక్రమాలు, పంచాయతీ రికార్డుల నిర్వహణను ఆయన క్షుణ్ణంగా పరిశీలించారు. గ్రామంలో పారిశుద్ధ్యాన్ని మెరుగుపరచడంతో పాటు వ్యర్థాల నిర్వహణను సమర్థవంతంగా చేపట్టేందుకు తీసుకుంటున్న చర్యలపై అధికారులను వివరాలు అడిగి తెలుసుకున్నారు.
గ్రామంలో ఫోర్‌వే సిగ్రిగేషన్‌లో భాగంగా సానిటరీ వేస్ట్ మేనేజ్‌మెంట్ విధానాన్ని పరిశీలించారు. చెత్తను వేర్వేరుగా సేకరించడం, వర్గీకరించడం, వ్యర్థాలను సక్రమంగా నిర్వహించడం వంటి అంశాలపై అధికారులకు పలు సూచనలు చేశారు. గ్రామ పరిసరాలను పరిశుభ్రంగా ఉంచేందుకు ప్రజలకు అవగాహన కల్పించాలని, తడి, పొడి తదితర వ్యర్థాలను వేర్వేరుగా నిర్వహించే విధానాన్ని పకడ్బందీగా అమలు చేయాలని సూచించారు.
అనంతరం గ్రామ పంచాయతీ కార్యాలయంలో రికార్డుల నిర్వహణను పరిశీలించి, పంచాయతీ పరిపాలనకు సంబంధించిన వివరాలను సమీక్షించారు. గ్రామంలోని పల్లె ప్రకృతి వనం, నర్సరీలను సందర్శించి వాటి నిర్వహణను పరిశీలించారు. మొక్కల సంరక్షణ, పచ్చదనం పెంపు, పర్యావరణ పరిరక్షణకు తీసుకుంటున్న చర్యలపై వివరాలు తెలుసుకున్నారు.
అలాగే గ్రామంలోని డంప్ షెడ్‌ను సందర్శించి, ఘన వ్యర్థాల నుంచి సేంద్రీయ ఎరువును తయారు చేసే కంపోస్టింగ్ విధానాన్ని పరిశీలించారు. వ్యర్థాలను సక్రమంగా వేరు చేసి కంపోస్టింగ్ ప్రక్రియ ద్వారా ఉపయోగకరమైన సేంద్రీయ ఎరువుగా మార్చడం వల్ల గ్రామ పారిశుద్ధ్యం మెరుగుపడటంతో పాటు పర్యావరణానికి మేలు జరుగుతుందని తెలిపారు. ఈ విధానాలను నిరంతరం పర్యవేక్షిస్తూ గ్రామాన్ని పరిశుభ్రంగా ఉంచేందుకు అధికారులు, పంచాయతీ సిబ్బంది సమన్వయంతో పనిచేయాలని సూచించారు.
ఈ పర్యటనలో జిల్లా పంచాయతీ అధికారి యాదయ్య, డీఎల్‌పీవో సాయిబాబా, ఎంపీడీవో ప్రీతి రెడ్డి, ఎంపీఓ శ్రీనివాస్ రెడ్డి, గ్రామ సర్పంచ్ నాగరాజు, గ్రామ పంచాయతీ పాలకవర్గ సభ్యులు, పంచాయతీ కార్యదర్శి తదితరులు పాల్గొన్నారు.
