చిన్న ఘనపూర్‌లో ఘనంగా గణపతి నిమజ్జన వేడుకలు
కొల్చారం, తెలుగు ట్రెండ్స్:
మెదక్ జిల్లా కొల్చారం మండలం చిన్న ఘనపూర్ గ్రామంలో గణపతి నవరాత్రి ఉత్సవాల ముగింపు సందర్భంగా శనివారం రాత్రి గణపతి నిమజ్జన వేడుకలను భక్తిశ్రద్ధలతో ఘనంగా నిర్వహించారు. చిన్న ఘనపూర్ సొసైటీ వైస్ చైర్మన్ పి. రాజు గౌడ్ ఆధ్వర్యంలో జరిగిన ఈ వేడుకల్లో గ్రామ ప్రజలు పెద్ద సంఖ్యలో పాల్గొని గణనాథుడికి ఘనంగా వీడ్కోలు పలికారు.
నిమజ్జన ఊరేగింపు సందర్భంగా గ్రామంలో పండుగ వాతావరణం నెలకొంది. భక్తులు గణపతి నామస్మరణ చేస్తూ, భక్తి గీతాలు ఆలపిస్తూ ఉత్సాహంగా ముందుకు సాగారు. డప్పులు, బ్యాండ్‌ మేళాలు, భక్తి పాటలతో ఊరేగింపు సందడిగా సాగింది.
ఈ సందర్భంగా చిన్నారులు ప్రత్యేక ఆకర్షణగా నిలిచారు. భక్తి గీతాలు, పాటలకు అనుగుణంగా చిన్నారులు ఆనందంగా నృత్యాలు చేస్తూ సందడి చేశారు. యువత, మహిళలు, వృద్ధులు సైతం ఉత్సాహంగా పాల్గొని గణపతి బప్పా మోరియా అంటూ నినాదాలు చేశారు. గ్రామంలోని వీధులు గణపతి నామస్మరణతో మార్మోగాయి.
భక్తులు గణనాథుడికి ప్రత్యేక పూజలు నిర్వహించి, కొబ్బరికాయలు కొట్టి, హారతులు ఇచ్చి తమ మొక్కులు చెల్లించుకున్నారు. అనంతరం గణపతి విగ్రహాన్ని భక్తిశ్రద్ధలతో ఊరేగింపుగా తీసుకెళ్లి నిమజ్జనం చేశారు.
‘గణపతి బప్పా మోరియా.. వచ్చే ఏడాది మళ్లీ రావయ్యా’ అంటూ భక్తులు నినాదాలు చేస్తూ గణనాథుడికి వీడ్కోలు పలికారు. గణపతి నవరాత్రి ఉత్సవాలు గ్రామ ప్రజల్లో భక్తి, ఆనందం, ఐక్యతను పెంపొందించాయని నిర్వాహకులు తెలిపారు.
ఈ కార్యక్రమంలో గ్రామసర్పంచ్ మధుసూదన్ రెడ్డి ఉపసర్పంచ్ నర్సింహాలు వార్డ్ సభ్యులు గ్రామ ప్రజలు , యువత, మహిళలు, చిన్నారులు, భక్తులు పెద్ద సంఖ్యలో పాల్గొన్నారు.
