తారక రామానగర్‌లో గణనాథుడికి ఘనంగా పూజలు
భక్తిశ్రద్ధలతో ప్రారంభమైన వినాయక నవరాత్రి ఉత్సవాలు
మెదక్, సెప్టెంబర్ 14 (తెలుగు ట్రెండ్స్ న్యూస్):
మెదక్ పట్టణంలోని తారక రామానగర్ కాలనీలో శివాజీ గణేష్ మండలి ఆధ్వర్యంలో వినాయక నవరాత్రి ఉత్సవాలు సోమవారం రాత్రి భక్తిశ్రద్ధలతో ఘనంగా ప్రారంభమయ్యాయి. గణనాథుడి విగ్రహాన్ని మండపానికి తీసుకువచ్చే సందర్భంగా భక్తులు పెద్ద సంఖ్యలో పాల్గొని జై బోలో గణేష్ మహారాజ్ కీ జై, గణపతి బప్పా మోరియా అంటూ నినాదాలతో సందడి చేశారు.
అనంతరం గణనాథుడికి ప్రత్యేక పూజలు నిర్వహించి నవరాత్రి ఉత్సవాలను ప్రారంభించారు. వేద మంత్రోచ్ఛారణలు, భక్తుల నామస్మరణలతో కాలనీలో ఆధ్యాత్మిక వాతావరణం నెలకొంది. ఈ సందర్భంగా భక్తులు పెద్ద సంఖ్యలో మండపానికి చేరుకుని గణనాథుడిని దర్శించుకుని ప్రత్యేక పూజలు నిర్వహించారు.
వినాయక నవరాత్రి ఉత్సవాలను పురస్కరించుకుని మండలి ఆధ్వర్యంలో ప్రత్యేక కార్యక్రమాలను నిర్వహించేందుకు ఏర్పాట్లు చేసినట్లు నిర్వాహకులు తెలిపారు. ఉత్సవాలు ప్రశాంతంగా, భక్తిశ్రద్ధలతో జరిగేలా అన్ని ఏర్పాట్లు చేస్తున్నామని పేర్కొన్నారు.
గణనాథుడి ఆశీస్సులతో ప్రతి ఒక్కరి జీవితాల్లో సుఖసంతోషాలు, ఆయురారోగ్యాలు, శాంతి నెలకొనాలని భక్తులు ఆకాంక్షించారు. నవరాత్రుల సందర్భంగా ప్రతిరోజూ భక్తులు పెద్ద సంఖ్యలో పాల్గొని స్వామివారిని దర్శించుకోవాలని మండలి సభ్యులు కోరారు.
ఈ కార్యక్రమంలో ఉత్సవ కమిటీ సభ్యులు ప్రభాకర్, శివకుమార్, శ్రీనివాస్, సందీప్ రెడ్డి, ప్రదీప్ రెడ్డి, సంతోష్, క్రాంతి, సాయిగౌడ్, తరుణ్, పార్థు బాబు, సుదీర్, అచ్యుత్, సాయి, పవన్ తదితరులు పాల్గొన్నారు.
