రైల్వే సమస్యల పరిష్కారానికి ఎంపీ రఘునందన్‌రావు చొరవ
బ్రాహ్మణపల్లి గేట్ వద్ద ఆర్వోబీ.. అక్కన్నపేటలో అజంతా ఎక్స్‌ప్రెస్‌కు హాల్టింగ్‌
10 రోజుల్లో డీపీఆర్‌ పూర్తి చేస్తామన్న రైల్వే జీఎం
వెల్దుర్తి మండలం, సెప్టెంబర్‌ 9 (తెలుగు ట్రెండ్స్ న్యూస్): నర్సాపూర్‌–తూప్రాన్‌ రైల్వే మార్గంలోని ప్రజల సమస్యల పరిష్కారానికి మెదక్‌ ఎంపీ రఘునందన్‌రావు ప్రత్యేక చొరవ తీసుకున్నారు. బ్రాహ్మణపల్లి గేట్ వద్ద రైల్వే ఓవర్‌ బ్రిడ్జి (ఆర్వోబీ) నిర్మాణంతో పాటు అక్కన్నపేట రైల్వే స్టేషన్‌లో అజంతా ఎక్స్‌ప్రెస్‌కు హాల్టింగ్‌ సౌకర్యం కల్పించాలని రైల్వే అధికారులను కోరారు.
ఈ మేరకు బుధవారం సికింద్రాబాద్‌లోని సౌత్‌ సెంట్రల్‌ రైల్వే జీఎం సంజయ్‌కుమార్‌ శ్రీవాస్తవను ఎంపీ రఘునందన్‌రావు కలిసి ప్రజల తరఫున పలు సమస్యలను ఆయన దృష్టికి తీసుకెళ్లారు. నర్సాపూర్‌–తూప్రాన్‌ రైల్వే మార్గంలో బ్రాహ్మణపల్లి గేట్ వద్ద రైల్వే గేట్ కారణంగా ప్రజలు, వాహనదారులు ఎదుర్కొంటున్న ఇబ్బందులను వివరించి, అక్కడ ఆర్వోబీ నిర్మాణం చేపట్టాలని విజ్ఞప్తి చేశారు.
అలాగే అక్కన్నపేట రైల్వే స్టేషన్‌లో అజంతా ఎక్స్‌ప్రెస్‌ రైళ్లకు హాల్టింగ్‌ సౌకర్యం కల్పించాలని కోరారు. ఈ హాల్టింగ్‌ అందుబాటులోకి వస్తే రామాయంపేట, చేగుంట, శంకరంపేట, నార్సింగి, అక్కన్నపేటతో పాటు పరిసర ప్రాంతాల ప్రజలకు రైలు ప్రయాణం మరింత సౌకర్యవంతంగా మారుతుందని ఎంపీ వివరించారు.
10 రోజుల్లో డీపీఆర్‌.. పనులకు మంజూరు
ఎంపీ రఘునందన్‌రావు విజ్ఞప్తిపై రైల్వే జీఎం సానుకూలంగా స్పందించినట్లు ఎంపీ వర్గాలు వెల్లడించాయి. బ్రాహ్మణపల్లి ఆర్వోబీకి సంబంధించి 10 రోజుల్లో డీపీఆర్‌ (సమగ్ర ప్రాజెక్టు నివేదిక) సిద్ధం చేసి, పనుల మంజూరుకు అవసరమైన చర్యలు తీసుకుంటామని జీఎం హామీ ఇచ్చినట్లు తెలిపారు.
ఆర్వోబీ నిర్మాణం పూర్తయితే బ్రాహ్మణపల్లి గేట్ వద్ద తరచూ ఏర్పడే ట్రాఫిక్‌ సమస్యలకు పరిష్కారం లభించడంతో పాటు ప్రజలకు రాకపోకలు సులభతరం కానున్నాయి.
ఎంపీకి ప్రజల కృతజ్ఞతలు
ప్రజలు ఎదుర్కొంటున్న రైల్వే సమస్యలను గుర్తించి, వాటి పరిష్కారానికి సంబంధిత అధికారులతో చర్చించి ముందుకు తీసుకెళ్తున్న ఎంపీ రఘునందన్‌రావుకు నర్సాపూర్‌, శివంపేట, తూప్రాన్‌ ప్రాంతాల ప్రజల తరఫున బీజేపీ నాయకులు కృతజ్ఞతలు తెలిపారు. ప్రజా అవసరాలకు అనుగుణంగా రైల్వే అభివృద్ధి పనులకు ఎంపీ చొరవ చూపడం అభినందనీయమని పేర్కొన్నారు.
ఈ కార్యక్రమంలో మెదక్‌ జిల్లా బీజేపీ అధ్యక్షుడు వాళ్దాస్‌ మల్లేష్‌ గౌడ్‌, జిల్లా ప్రధాన కార్యదర్శి సంఘసాని సురేష్‌, రాష్ట్ర కౌన్సిల్‌ సభ్యుడు కొండల్‌రావు, ఓబీసీ మోర్చా రాష్ట్ర నాయకుడు రమేష్‌ గౌడ్‌, జిల్లా కార్యదర్శి బిక్షపతి, జిల్లా కోశాధికారి ఆంజనేయులు గౌడ్‌, మండల అధ్యక్షుడు రవి, మోర్చా జిల్లా నాయకులు విట్టల్‌ నాయక్‌, నగేష్‌ గౌడ్‌, సర్పంచ్‌ కుమార్‌, ఇతర నాయకులు పాల్గొన్నారు.
