తల్లి ఆరోగ్యమే.. శిశువు భవిష్యత్తు.. తూప్రాన్‌లో పోషణ మాసం అవగాహన

 

గర్భిణీల ఆరోగ్యానికి పోషకాహారమే పునాది

తూప్రాన్ ఏరియా ఆసుపత్రిలో పోషణ మాసం కార్యక్రమం.. సమతుల్య ఆహారంపై అవగాహన

తూప్రాన్, సెప్టెంబర్ 11 (తెలుగు ట్రెండ్స్):
గర్భిణీలు ఆరోగ్యకరమైన ఆహారం తీసుకోవడంతో తల్లి, బిడ్డ ఆరోగ్యంగా ఉంటారని వైద్య సిబ్బంది తెలిపారు. పోషణ మాసం సందర్భంగా తూప్రాన్ మండలంలోని తూప్రాన్ ఏరియా ఆసుపత్రిలో శుక్రవారం అవగాహన కార్యక్రమాన్ని నిర్వహించారు.

ఆసుపత్రికి ఆరోగ్య పరీక్షల కోసం వచ్చిన గర్భిణీలకు పోషకాహారం, సమతుల్య ఆహారం ప్రాధాన్యత, తల్లి–శిశువు ఆరోగ్యానికి అవసరమైన ఆహార పదార్థాల గురించి వైద్య సిబ్బంది వివరించారు. గర్భధారణ సమయంలో తీసుకోవాల్సిన ఆహారం, పాటించాల్సిన ఆరోగ్య జాగ్రత్తలపై అవగాహన కల్పించారు.

ఈ సందర్భంగా వివిధ రకాల పోషకాహార పదార్థాలను ప్రదర్శనగా ఏర్పాటు చేసి, వాటిలో ఉండే పోషక విలువలను గర్భిణీలకు వివరించారు. రోజువారీ ఆహారంలో అవసరమైన పోషకాలు ఉండేలా చూసుకోవాలని, వైద్యుల సూచనలను తప్పనిసరిగా పాటించాలని సూచించారు.

పోషణ ప్రతిజ్ఞ

కార్యక్రమంలో పాల్గొన్న గర్భిణీలు, సిబ్బందితో పోషణ ప్రతిజ్ఞ చేయించారు. తల్లి ఆరోగ్యం, శిశువు ఎదుగుదల కోసం పోషకాహారాన్ని నిర్లక్ష్యం చేయకుండా తీసుకోవాలని అవగాహన కల్పించారు.

ఈ సందర్భంగా ఏరియా ఆసుపత్రి సూపరింటెండెంట్ డాక్టర్ అమర్ సింగ్ మాట్లాడుతూ గర్భిణీలు సమతుల్యమైన ఆహారం తీసుకోవడం ద్వారా రక్తహీనత వంటి సమస్యలను నివారించుకోవడంతో పాటు తల్లి, బిడ్డ ఆరోగ్యాన్ని కాపాడుకోవచ్చని తెలిపారు. పోషకాహారంపై ప్రతి గర్భిణీ అవగాహన కలిగి ఉండాలని సూచించారు.

ఈ కార్యక్రమంలో ఏరియా ఆసుపత్రి సిబ్బంది, ఐసీడీఎస్ సూపర్‌వైజర్లు శివకుమారి, సుజాత, అంగన్వాడీ టీచర్లు తదితరులు పాల్గొన్నారు.