ఓటరు జాబితాపై 12, 13 తేదీల్లో ప్రత్యేక క్యాంపెయిన్
అర్హులైన ప్రతి ఒక్కరి ఓటు హక్కును పరిరక్షించడం సామాజిక బాధ్యత: తహసీల్దార్ చంద్రశేఖర్ రెడ్డి
తూప్రాన్, సెప్టెంబర్ 11 (తెలుగు ట్రెండ్స్):
అర్హులైన ప్రతి ఒక్కరి ఓటు హక్కును పరిరక్షించడం, తప్పులు లేని పారదర్శకమైన ఓటరు జాబితాను రూపొందించడం ప్రతి ఒక్కరి సామాజిక బాధ్యత అని తూప్రాన్ తహసీల్దార్ చంద్రశేఖర్ రెడ్డి అన్నారు. భారత ఎన్నికల సంఘం ఆదేశాల మేరకు ఓటరు జాబితా ప్రత్యేక సవరణ కార్యక్రమంలో భాగంగా 12, 13 తేదీల్లో అన్ని పోలింగ్ కేంద్రాల్లో రెండు రోజుల ప్రత్యేక క్యాంపెయిన్ నిర్వహించనున్నట్లు తెలిపారు.
శుక్రవారం విలేకరులతో మాట్లాడుతూ.. ఈ ప్రత్యేక క్యాంపెయిన్‌లో కొత్త ఓటర్ల నమోదు, ఓటరు జాబితాలో పేర్ల మార్పులు, చేర్పులు, తప్పుల సవరణలు, అభ్యంతరాల స్వీకరణకు అవకాశం ఉంటుందని పేర్కొన్నారు. అర్హత ఉన్న ప్రతి ఒక్కరూ తమ ఓటు హక్కును వినియోగించుకునేలా ఓటరు జాబితాలో పేరు ఉందో లేదో పరిశీలించుకోవాలని సూచించారు.
పేర్లు పరిశీలించుకోవాలి
ఓటర్లు తమ వివరాలను ఒకసారి పరిశీలించుకోవాలని తహసీల్దార్ సూచించారు. పేరులో తప్పులు, చిరునామా మార్పు, ఇతర వివరాల్లో సవరణలు అవసరమైనా లేదా అర్హత ఉన్నప్పటికీ ఓటరు జాబితాలో పేరు లేకపోయినా ప్రత్యేక క్యాంపెయిన్‌లో సంబంధిత దరఖాస్తులను సమర్పించుకోవచ్చని తెలిపారు.
అర్హులైన వారి పేర్లు జాబితాలో చేరేలా చూడడంతో పాటు, ఎలాంటి కారణం లేకుండా అర్హులైన ఓటర్ల పేర్లు తొలగిపోకుండా జాగ్రత్తలు తీసుకోవాల్సిన బాధ్యత అందరిపై ఉందన్నారు. తప్పులు లేని, పారదర్శకమైన ఓటరు జాబితా ప్రజాస్వామ్య వ్యవస్థకు ఎంతో కీలకమని పేర్కొన్నారు.
రాజకీయ పార్టీలు సహకరించాలి
ప్రత్యేక క్యాంపెయిన్‌ను విజయవంతం చేసేందుకు రాజకీయ పార్టీల అధ్యక్షులు, నాయకులు, బూత్ లెవల్ ఏజెంట్లు (బీఎల్‌ఏలు) తమవంతు సహకారం అందించాలని చంద్రశేఖర్ రెడ్డి కోరారు. పార్టీ శ్రేణులు, బూత్ స్థాయి కార్యకర్తల ద్వారా ఓటర్లకు ప్రత్యేక క్యాంపెయిన్‌పై అవగాహన కల్పించి, అర్హులైన ప్రతి ఒక్కరూ తమ పేర్లు ఓటరు జాబితాలో ఉండేలా చూడాలని సూచించారు.
రెండు రోజుల పాటు నిర్వహించే ప్రత్యేక శిబిరాలను రాజకీయ పార్టీల నాయకులు, బీఎల్‌ఏలు, ప్రజలు స్వచ్ఛందంగా వినియోగించుకుని విజయవంతం చేయాలని ఆయన కోరారు. ఓటరు జాబితాలో ఏవైనా అభ్యంతరాలు, మార్పులు లేదా సవరణలు అవసరమైతే ఈ అవకాశాన్ని సద్వినియోగం చేసుకోవాలని తహసీల్దార్ చంద్రశేఖర్ రెడ్డి సూచించారు.
