యూసుఫ్‌పేట ఈశ్వరాలయంలో ఘనంగా గణేష్ ఉత్సవాలు
మోదుగాకుల్లో అన్నప్రసాద వితరణ.. ఆకట్టుకున్న రామాయణం, మహాభారతం పోటీలు
పాపన్నపేట, సెప్టెంబర్ 21 (తెలుగు ట్రెండ్స్):
పాపన్నపేట మండల పరిధిలోని యూసుఫ్‌పేట గ్రామంలోని ఈశ్వరాలయంలో గణేష్ ఉత్సవ సమితి ఆధ్వర్యంలో వినాయక ఉత్సవ వేడుకలను ఘనంగా, ఆధ్యాత్మిక వాతావరణంలో నిర్వహించారు. ఉత్సవాల్లో భాగంగా గణనాథుడికి విశేష పూజలు నిర్వహించడంతో పాటు భక్తులకు తీర్థ ప్రసాద వితరణ చేపట్టారు.
పూజా కార్యక్రమాల అనంతరం సనాతన సంప్రదాయానికి ప్రతిబింబంగా మోదుగాకుల్లో అన్నప్రసాద వితరణ నిర్వహించారు. సంప్రదాయబద్ధంగా మోదుగాకుల్లో ప్రసాదం స్వీకరించేందుకు భక్తులు పెద్ద సంఖ్యలో తరలివచ్చారు. భక్తులకు నిర్వాహకులు అన్నప్రసాదాన్ని అందించారు.
ఆకట్టుకున్న రామాయణం, మహాభారతం పోటీలు
చిన్నారులు, యువతకు రామాయణం, మహాభారతం వంటి ఇతిహాసాలపై అవగాహన కల్పించాలనే ఉద్దేశంతో గణేష్ ఉత్సవ సమితి ఆధ్వర్యంలో పలు ఆధ్యాత్మిక పోటీలను నిర్వహించారు. ఈ పోటీలకు విశేష స్పందన లభించగా విద్యార్థులు ఎంతో ఉత్సాహంగా పాల్గొన్నారు.
పోటీల్లో ఉత్తమ ప్రతిభ కనబరిచిన విజేతలకు ఉత్సవ సమితి సభ్యులు శాలువాలు, జ్ఞాపికలు, బహుమతులు అందజేసి అభినందించారు. చిన్నారులు, యువతలో మన సంస్కృతి, సంప్రదాయాలపై ఆసక్తి పెంచేలా ఈ కార్యక్రమాలు నిర్వహించడం పట్ల గ్రామస్తులు హర్షం వ్యక్తం చేశారు.
ఈ సందర్భంగా ఉత్సవ సమితి ప్రతినిధులు మాట్లాడుతూ.. భక్తిశ్రద్ధలతో పాటు మన సంస్కృతి, సంప్రదాయాలను భవిష్యత్ తరాలకు అందించాలనే ఉద్దేశంతో మోదుగాకుల్లో అన్నప్రసాద వితరణ, రామాయణం, మహాభారతం పోటీలను నిర్వహించినట్లు తెలిపారు. గ్రామ ప్రజలు, భక్తుల సహకారంతో గణేష్ ఉత్సవ వేడుకలు విజయవంతంగా నిర్వహించినట్లు పేర్కొన్నారు.
ఈ కార్యక్రమంలో గణేష్ ఉత్సవ సమితి నిర్వాహకులు, గ్రామ పెద్దలు, భక్తులు, విద్యార్థులు తదితరులు పాల్గొన్నారు.
