జిల్లా ఎస్పీకి మట్టి వినాయక విగ్రహం అందజేత
పర్యావరణ పరిరక్షణలో భాగంగా మట్టి విగ్రహాలను ప్రోత్సహించాలని విజ్ఞప్తి
అందోలు,సంగారెడ్డి,
సెప్టెంబర్ 10 (తెలుగు ట్రెండ్స్):
సంగారెడ్డి జిల్లా ఎస్పీ పరితోష్ పంకజ్ను బీఆర్‌ఎస్‌వీ నాయకులు అఖిల్ మర్యాదపూర్వకంగా కలిసి మట్టి వినాయక విగ్రహాన్ని అందజేశారు. పర్యావరణ పరిరక్షణను దృష్టిలో ఉంచుకుని వినాయక చవితి వేడుకల్లో మట్టి విగ్రహాలను వినియోగించేలా ప్రజల్లో అవగాహన కల్పించాలని కోరారు.
ఈ సందర్భంగా అఖిల్ మాట్లాడుతూ ప్లాస్టర్ ఆఫ్ పారిస్‌తో తయారు చేసిన విగ్రహాల వల్ల నీటి కాలుష్యం పెరిగే అవకాశం ఉన్నందున ప్రజలు వీలైనంత వరకు మట్టి వినాయక విగ్రహాలను వినియోగించాలని సూచించారు. మట్టి విగ్రహాలను ప్రోత్సహించడం ద్వారా పర్యావరణ పరిరక్షణకు తోడ్పడటంతో పాటు నీటి వనరులను కాలుష్యం నుంచి కాపాడుకోవచ్చని తెలిపారు.
వినాయక చవితి పండుగను భక్తిశ్రద్ధలతో పాటు పర్యావరణహితంగా నిర్వహించాల్సిన బాధ్యత ప్రతి ఒక్కరిపై ఉందన్నారు. పర్యావరణాన్ని కాపాడేందుకు ప్రజలు తమ వంతు బాధ్యతగా మట్టి విగ్రహాలనే వినియోగించి, ఇతరులకు కూడా అవగాహన కల్పించాలని కోరారు.
ఈ సందర్భంగా జిల్లా ఎస్పీ పరితోష్ పంకజ్ మట్టి వినాయక విగ్రహాన్ని స్వీకరించారు. పర్యావరణ పరిరక్షణకు సంబంధించిన కార్యక్రమాలను అభినందించారు. ప్రజల్లో పర్యావరణంపై అవగాహన పెంచేందుకు చేపడుతున్న కార్యక్రమాలు అభినందనీయమని పేర్కొన్నారు.
కార్యక్రమంలో అసద్, అడ్నాన్, సబీల్ తదితరులు పాల్గొన్నారు.
