ఐలమ్మ జీవితం నేటి తరానికి స్ఫూర్తిదాయకం
వీరనారి ఐలమ్మకు అదనపు కలెక్టర్ పాండు ఘన నివాళులు
అందోలు,సంగారెడ్డి,సెప్టెంబర్ 10 (తెలుగు ట్రెండ్స్):
వీరనారి చాకలి ఐలమ్మ జీవితం, ఆమె పోరాట స్ఫూర్తి నేటి తరానికి స్ఫూర్తిదాయకమని సంగారెడ్డి జిల్లా అదనపు కలెక్టర్ పాండు అన్నారు. చాకలి ఐలమ్మ వర్ధంతిని పురస్కరించుకుని గురువారం సంగారెడ్డి జిల్లా కలెక్టరేట్‌ సమీపంలోని ఐలమ్మ విగ్రహానికి ఆయన పూలమాల వేసి ఘనంగా నివాళులర్పించారు.
ఈ సందర్భంగా అదనపు కలెక్టర్ పాండు మాట్లాడుతూ అణగారిన వర్గాల హక్కుల కోసం, సామాజిక న్యా
యం, ఆత్మగౌరవం కోసం చాకలి ఐలమ్మ సాగించిన పోరాటం చరిత్రలో చిరస్థాయిగా నిలిచిపోయిందన్నారు. అన్యాయాన్ని, అణచివేతను ధైర్యంగా ఎదుర్కొని హక్కుల కోసం పోరాడిన ఆమె ధైర్యసాహసాలు ప్రతి ఒక్కరికీ ఆదర్శమని పేర్కొన్నారు.
సమాజంలోని పేదలు, బడుగు, బలహీన వర్గాల హక్కుల కోసం ఐలమ్మ చేసిన పోరాటాన్ని నేటి తరానికి తెలియజేయాల్సిన అవసరం ఉందన్నారు. ఆమె చూపిన మార్గంలో పయనిస్తూ సామాజిక సమానత్వం, ఆత్మగౌరవం, న్యాయం కోసం ప్రతి ఒక్కరూ కృషి చేయాలని పిలుపునిచ్చారు.
ఐలమ్మ పోరాటం ఒక వ్యక్తికి సంబంధించినది మాత్రమే కాదని, అణచివేతకు వ్యతిరేకంగా ప్రజల్లో చైతన్యం తీసుకొచ్చిన ఉద్యమానికి ప్రతీకగా నిలిచిందని తెలిపారు. ఆమె ఆశయాలను స్మరించుకోవడంతో పాటు సమాజంలో సమానత్వం, సామాజిక న్యాయాన్ని బలోపేతం చేసేందుకు కృషి చేయాలని సూచించారు.
ఈ కార్యక్రమంలో జిల్లా వెనుకబడిన తరగతుల సంక్షేమ అధికారి జగదీష్, వివిధ శాఖల జిల్లా అధికారులు, వివిధ కుల సంఘాల నాయకులు, స్థానిక ప్రజాప్రతినిధులు తదితరులు పాల్గొని చాకలి ఐలమ్మకు ఘనంగా నివాళులర్పించారు.
