సూర్య యూత్ ఆధ్వర్యంలో అన్నదానం.. గణపతికి ప్రత్యేక పూజలు
జోగిపేట, సెప్టెంబర్ 24 (తెలుగు ట్రెండ్స్): వినాయక నవరాత్రుల్లో భాగంగా జోగిపేట పట్టణంలోని అరెకటిక సంఘంలో సూర్య యూత్ ఆధ్వర్యంలో ఏర్పాటు చేసిన గణపతి ఉత్సవాలు భక్తిశ్రద్ధలతో కొనసాగుతున్నాయి. గత కొన్ని రోజులుగా గణనాథుడికి ప్రత్యేక పూజలు, భక్తి కార్యక్రమాలు నిర్వహిస్తూ ఉత్సవాలను ఘనంగా నిర్వహిస్తున్నారు.
గురువారం సూర్య యూత్ ఆధ్వర్యంలో ప్రత్యేకంగా అన్నదాన కార్యక్రమాన్ని నిర్వహించారు. ఈ సందర్భంగా పెద్ద సంఖ్యలో భక్తులు, కాలనీవాసులు పాల్గొని అన్నప్రసాదాన్ని స్వీకరించారు. భక్తులకు ఎలాంటి ఇబ్బందులు కలగకుండా నిర్వాహకులు ఏర్పాట్లు చేశారు.
అన్నదాన కార్యక్రమానికి అందోలు–జోగిపేట మున్సిపల్ చైర్మన్ కృష్ణారెడ్డి, వైస్ చైర్మన్ ఆకుల సత్యనారాయణ (చిట్టిబాబు), మాజీ వార్డు సభ్యుడు అల్లే శ్రీకాంత్, అరెకటిక సంఘం నాయకులు హాజరయ్యారు. ఈ సందర్భంగా వారు గణపతికి ప్రత్యేక పూజలు నిర్వహించి స్వామివారి ఆశీస్సులు పొందారు.
వినాయక నవరాత్రుల సందర్భంగా భక్తులు భక్తిశ్రద్ధలతో పూజల్లో పాల్గొంటున్నారు. గణనాథుడి ఆశీస్సులతో ప్రజలందరూ సుఖసంతోషాలతో, ఆయురారోగ్యాలతో ఉండాలని సూర్య యూత్ సభ్యులు ఆకాంక్షించారు. ఉత్సవాలను విజయవంతంగా నిర్వహించేందుకు యూత్ సభ్యులు, అరెకటిక సంఘం నాయకులు సమన్వయంతో కార్యక్రమాలను కొనసాగిస్తున్నారు.
