ఆధ్యాత్మిక చింతనతో సమాజంలో శాంతి
600 మట్టి వినాయక విగ్రహాల ఉచిత పంపిణీ
జోగిపేట, సెప్టెంబర్ 13 (తెలుగు ట్రెండ్స్ న్యూస్):
ప్రతి ఒక్కరిలో ఆధ్యాత్మిక చింతన పెంపొందాలని, తద్వారా సమాజంలో శాంతి, సోదరభావం నెలకొల్పవచ్చని జోగిపేట ఎస్‌ఐ గిరి శ్రీకాంత్‌ అన్నారు. వినాయక చవితిని పురస్కరించుకుని ఆదివారం జోగిపేట పట్టణంలో వివేకానంద యూత్‌ ఆధ్వర్యంలో ఉచితంగా మట్టి వినాయక విగ్రహాలను పంపిణీ చేశారు.
ఈ సందర్భంగా ఎస్‌ఐ గిరి శ్రీకాంత్‌ మాట్లాడుతూ వినాయక నవరాత్రి ఉత్సవాలను భక్తిశ్రద్ధలతో, ప్రశాంత వాతావరణంలో నిర్వహించుకోవాలని సూచించారు. గణేశ్‌ మండపాల నిర్వాహకులు చిన్నారుల విషయంలో ప్రత్యేక జాగ్రత్తలు తీసుకోవాలని, నిమజ్జనం పూర్తయ్యే వరకు బాధ్యతాయుతంగా వ్యవహరించాలని కోరారు. ఉత్సవాల సందర్భంగా ఎలాంటి అవాంఛనీయ ఘటనలకు తావులేకుండా పోలీసులకు సహకరించాలని సూచించారు.
పర్యావరణ పరిరక్షణలో భాగంగా మట్టి వినాయక విగ్రహాలను పూజించడం అభినందనీయమని ఎస్‌ఐ పేర్కొన్నారు. పర్యావరణహిత గణపతి విగ్రహాల వినియోగంపై ప్రజల్లో అవగాహన కల్పించేందుకు వివేకానంద యూత్‌ చేపట్టిన కార్యక్రమాన్ని అభినందించారు. మట్టి విగ్రహాలను అందించేందుకు కాంగ్రెస్‌ నాయకులు, ప్రముఖ బిల్డర్‌ సురోత్తంరెడ్డి, వ్యాపారవేత్త సార శివకుమార్‌ అందించిన సహాయ సహకారాలు అభినందనీయమన్నారు.
వివేకానంద యూత్‌ ఆధ్వర్యంలో మొత్తం 600 మట్టి గణపతి విగ్రహాలను ప్రజలకు ఉచితంగా పంపిణీ చేశారు. పర్యావరణాన్ని కాపాడుతూ భక్తిశ్రద్ధలతో వినాయక చవితిని జరుపుకోవాలని నిర్వాహకులు ప్రజలకు సూచించారు.
ఈ కార్యక్రమంలో కాంగ్రెస్‌ నాయకులు తుడుం యాదయ్య, మాజీ ఎంపీటీసీ సభ్యులు ఆకుల శంకర్‌, యాదగిరి, వివేకానంద యూత్‌ సభ్యులు ప్రవీణ్‌, సాయి, సోను, అఖిల్‌, ప్రభు, నాని తదితరులు పాల్గొన్నారు.
