టేక్మాల్‌లో మట్టి గణపతుల పంపిణీ.. పర్యావరణ పరిరక్షణకు బీజేపీ మహిళా మోర్చా పిలుపు
మట్టి గణపతులను పూజిద్దాం.. పర్యావరణాన్ని కాపాడదాం: డాక్టర్‌ పట్లోల మల్లికా అశోక్‌
పాపన్నపేట, సెప్టెంబర్ 13 (తెలుగు ట్రెండ్స్ న్యూస్):
ప్రతి ఒక్కరూ మట్టి గణపతి విగ్రహాలను పూజించి పర్యావరణ పరిరక్షణకు తమ వంతు సహకారం అందించాలని బీజేపీ మెదక్‌ జిల్లా మహిళా మోర్చా అధ్యక్షురాలు డాక్టర్‌ పట్లోల మల్లికా అశోక్‌ పిలుపునిచ్చారు. వినాయక చవితిని పురస్కరించుకుని టేక్మాల్‌ మండలంలోని పలు గ్రామాల్లో మట్టి గణపతి విగ్రహాలను పంపిణీ చేశారు.
ఈ సందర్భంగా డాక్టర్‌ మల్లికా అశోక్‌ మాట్లాడుతూ.. వినాయక చవితి పండుగను భక్తిశ్రద్ధలతో జరుపుకోవడంతో పాటు పర్యావరణ పరిరక్షణకు ప్రతి ఒక్కరూ ప్రాధాన్యత ఇవ్వాలని కోరారు. మట్టి గణపతులను పూజించడం ద్వారా నీటి వనరుల కాలుష్యాన్ని తగ్గించి ప్రకృతిని కాపాడుకోవచ్చని తెలిపారు.
రసాయన రంగులు, ప్లాస్టర్‌ ఆఫ్‌ పారిస్‌తో తయారు చేసిన విగ్రహాలను నిమజ్జనం చేయడం వల్ల చెరువులు, కుంటలు, ఇతర నీటి వనరులు కలుషితమయ్యే అవకాశం ఉందన్నారు. రసాయనాల ప్రభావంతో నీటిలోని చేపలు, ఇతర జలచరాలకు హాని కలిగే ప్రమాదం ఉందని పేర్కొన్నారు. కలుషితమైన నీటి వల్ల జీవరాశులపై కూడా ప్రతికూల ప్రభావం పడుతుందని వివరించారు.
ప్రజలకు పర్యావరణ పరిరక్షణపై అవగాహన కల్పించాలనే ఉద్దేశంతో మట్టి గణపతి విగ్రహాలను పంపిణీ చేస్తున్నామని మల్లికా అశోక్‌ తెలిపారు. సాధ్యమైనంత వరకు ప్రతి ఒక్కరూ మట్టి గణపతిని ప్రతిష్ఠించి పూజించాలని విజ్ఞప్తి చేశారు. పర్యావరణహితమైన వినాయక విగ్రహాల వినియోగాన్ని ప్రోత్సహించేందుకు ప్రతి సంవత్సరం తమ వంతుగా పలువురికి మట్టి గణపతి విగ్రహాలను పంపిణీ చేస్తామని చెప్పారు.
వినాయక చవితి వేడుకల్లో భక్తితో పాటు పర్యావరణ స్పృహను పెంపొందించుకోవాలని ఆమె సూచించారు. భవిష్యత్‌ తరాలకు స్వచ్ఛమైన నీటి వనరులు, ఆరోగ్యకరమైన వాతావరణాన్ని అందించాలంటే మట్టి గణపతుల వినియోగాన్ని ప్రతి ఒక్కరూ ప్రోత్సహించాలని పిలుపునిచ్చారు.
ఈ కార్యక్రమంలో మాజీ సర్పంచ్‌ భక్తుల వరలక్ష్మి, స్వరూప, శిరీష, లక్ష్మి రాజేశ్వరి, సరస్వతి, శోభ, జ్యోతి తదితరులు పాల్గొన్నారు.
