పద్మశాలి సంఘం బలోపేతానికి రాష్ట్ర నాయకుల బస్సు యాత్ర
జగిత్యాలలో భవన నిర్మాణ కమిటీ ఛైర్మన్‌ బోగ వెంకటేశ్వర్లుతో రాష్ట్ర నాయకుల భేటీ
పాపన్నపేట, అక్టోబర్‌ 12 (తెలుగు ట్రెండ్స్):
తెలంగాణ రాష్ట్ర పద్మశాలి సంఘం (టీఆర్‌పీఎస్‌) బలోపేతం, సంఘంలో నెలకొన్న సమస్యల పరిష్కారమే లక్ష్యంగా రాష్ట్ర నాయకులు జిల్లాల పర్యటనకు శ్రీకారం చుట్టారు. ఇందులో భాగంగా సోమవారం జగిత్యాల జిల్లా కేంద్రంలో తెలంగాణ రాష్ట్ర పద్మశాలి సంఘం భవన నిర్మాణ కమిటీ ఛైర్మన్‌ బోగ వెంకటేశ్వర్లును రాష్ట్ర అధ్యక్షుడు వరకట్‌ రాజ్‌కుమార్‌ ఆధ్వర్యంలోని నాయకుల బృందం కలిసింది.
ఈ సందర్భంగా సంఘానికి సంబంధించిన పలు సమస్యలు, భవన నిర్మాణం తదితర అంశాలపై చర్చించి, నాయకులు తమ సూచనలు, సలహాలను అందించారు. పద్మశాలి సంఘాన్ని మరింత బలోపేతం చేయడంతో పాటు సభ్యులు ఎదుర్కొంటున్న సమస్యలను గుర్తించి, వాటి పరిష్కారానికి సమష్టిగా కృషి చేయాలని నిర్ణయించినట్లు నాయకులు తెలిపారు.
రాష్ట్రవ్యాప్తంగా సంఘాన్ని బలోపేతం చేయడం, జిల్లాల వారీగా సమస్యలను తెలుసుకోవడం, వాటి పరిష్కారానికి కార్యాచరణ రూపొందించడం లక్ష్యంగా బస్సు యాత్ర చేపడుతున్నట్లు సంఘం నాయకులు పేర్కొన్నారు. ఈ యాత్ర ద్వారా పద్మశాలి సంఘం సభ్యులతో నేరుగా సమావేశమై వారి అభిప్రాయాలు, సమస్యలను తెలుసుకోనున్నట్లు తెలిపారు.
ఈ కార్యక్రమంలో టీఆర్‌పీఎస్‌ రాష్ట్ర అధ్యక్షుడు వరకట్‌ రాజ్‌కుమార్‌, ఉపాధ్యక్షులు మేకల జయరాములు, వనమాల శంకర్‌ తదితరులు పాల్గొన్నారు.
