వెల్దుర్తిలో విద్యార్థులకు పౌష్టికాహారం.. అల్పాహార పథకం ప్రారంభం

 

విద్యార్థులకు ఇక ఉదయాన్నే పౌష్టికాహారం.. ఇడ్లీతో అల్పాహార పథకం ప్రారంభం

వెల్దుర్తి మండలం

తెలుగు ట్రేండ్స్, అక్టోబర్ 7: తెలంగాణ రాష్ట్ర ప్రభుత్వం ప్రతిష్ఠాత్మకంగా అమలు చేస్తున్న విద్యార్థుల అల్పాహార పథకాన్ని వెల్దుర్తి మండల కేంద్రంలోని పీఎం శ్రీ జిల్లా పరిషత్ ఉన్నత పాఠశాలలో బుధవారం ఘనంగా ప్రారంభించారు. గ్రామ సర్పంచ్ ఆదర్శ్, ఉపసర్పంచ్ శ్రావణ్ కుమార్, అమ్మ ఆదర్శ పాఠశాల కమిటీ చైర్మన్ మాధురి, పాఠశాల ప్రధానోపాధ్యాయుడు సాంబయ్య కలిసి ఈ కార్యక్రమాన్ని ప్రారంభించారు.

పథకం ప్రారంభం సందర్భంగా తొలిరోజు విద్యార్థులకు ఇడ్లీని అల్పాహారంగా అందించారు. ఉదయం వేళ పాఠశాలకు వచ్చే విద్యార్థులకు పౌష్టికాహారం అందుబాటులోకి రావడంతో విద్యార్థులు, ఉపాధ్యాయుల్లో ఆనందం వ్యక్తమైంది.

ఈ సందర్భంగా ప్రధానోపాధ్యాయుడు సాంబయ్య మాట్లాడుతూ విద్యార్థులకు నాణ్యమైన పౌష్టికాహారం అందించడం ద్వారా వారి ఆరోగ్యం మెరుగుపడటంతో పాటు ఏకాగ్రత, అభ్యసన సామర్థ్యం పెరుగుతాయని తెలిపారు. విద్యార్థులు తరగతి గదిలో చురుకుగా పాల్గొనేందుకు ఈ పథకం దోహదపడుతుందని పేర్కొన్నారు. ప్రభుత్వం అందిస్తున్న ఈ సదుపాయాన్ని విద్యార్థులు సద్వినియోగం చేసుకోవాలని సూచించారు.

అల్పాహార పథకం ప్రారంభంతో విద్యార్థుల్లో ఉత్సాహం నెలకొంది. తొలిరోజు ఇడ్లీని ఆనందంగా స్వీకరించిన విద్యార్థులు ప్రభుత్వం తమ ఆరోగ్యం, విద్యపై ప్రత్యేక శ్రద్ధ చూపుతూ ఇలాంటి కార్యక్రమాలు అమలు చేయడం పట్ల సంతోషం వ్యక్తం చేశారు.

ప్రతిరోజూ పాఠశాల సమయానికి ముందే నాణ్యమైన అల్పాహారం అందించడం వల్ల విద్యార్థులు ఉత్సాహంగా తరగతులకు హాజరై చదువుపై మరింత దృష్టి సారించే అవకాశం ఉంటుందని ఉపాధ్యాయులు పేర్కొన్నారు.

ఈ కార్యక్రమంలో ఉపసర్పంచ్ శ్రావణ్ కుమార్, ఉపాధ్యాయులు శ్రీనివాస్ రావు, నరసింహారెడ్డి, చార్లెస్, అర్జున, నవనీత, అమూల్య, సునిత, శైలేజా, జేసుదా, ఖదీర్ పాషా, విజయ్, విజయ్ రామూ, వెంకట్రెడ్డి, ధనరాజ్ తదితరులతో పాటు విద్యార్థులు పాల్గొన్నారు.