బతుకమ్మ వేడుకలు ప్రారంభం.. ఏర్పాట్లు అంతంతమాత్రమే! జిల్లా వ్యాప్తంగా పారిశుధ్యం, భద్రతా ఏర్పాట్లపై నిర్లక్ష్యం?

 

బతుకమ్మ వేడుకలు ప్రారంభం.. ఏర్పాట్లు అంతంతమాత్రమే!

జిల్లా వ్యాప్తంగా పండుగ సందడి.. నిమజ్జన ఘాట్ల వద్ద సౌకర్యాలపై దృష్టి సారించాలి

తెలుగు ట్రెండ్స్, అందోలు 

– చాపల సత్యం:

తెలంగాణ సంస్కృతి, సంప్రదాయాలకు ప్రతీకగా నిలిచే పూల పండుగ బతుకమ్మ వేడుకలు ప్రారంభమయ్యాయి. మహాలయ అమావాస్య రోజున ఎంగిలిపూల బతుకమ్మతో మొదలైన ఈ సంబరాలు తొమ్మిది రోజుల పాటు కొనసాగనున్నాయి. తెలంగాణ ఆడపడుచులు ప్రకృతి ప్రసాదించిన తంగేడు, గునుగు, చామంతి, బంతి తదితర రంగురంగుల పూలతో బతుకమ్మలను పేర్చి, గౌరమ్మను పూజిస్తూ సంప్రదాయ పాటలతో వేడుకలను జరుపుకుంటున్నారు.

గ్రామగ్రామాన, పట్టణాల్లో బతుకమ్మ పండుగ సందడి కనిపిస్తోంది. మహిళలు, యువతులు సంప్రదాయ దుస్తులు ధరించి బతుకమ్మల చుట్టూ చేరి ఆటపాటలతో సంబరాలు చేసుకునేందుకు సిద్ధమవుతున్నారు. తెలంగాణ సంస్కృతి, ఆడపడుచుల ఐక్యతకు ప్రతీకగా నిలిచే ఈ పండుగను ఘనంగా నిర్వహించేందుకు ప్రజలు ఆసక్తి చూపుతున్నారు.

అయితే జిల్లా వ్యాప్తంగా బతుకమ్మ వేడుకలకు అవసరమైన ఏర్పాట్లు ఆశించిన స్థాయిలో కనిపించడం లేదనే అభిప్రాయాలు వ్యక్తమవుతున్నాయి. ముఖ్యంగా బతుకమ్మ నిమజ్జనం జరిగే చెరువులు, కుంటల వద్ద పారిశుధ్యం, విద్యుత్ దీపాలు, బారికేడ్లు వంటి కనీస సౌకర్యాలు కల్పించాల్సిన అవసరం ఉంది. నిమజ్జన సమయంలో ఎలాంటి అవాంఛనీయ ఘటనలు చోటుచేసుకోకుండా గజ ఈతగాళ్లను అందుబాటులో ఉంచడంతో పాటు మహిళల భద్రతకు ప్రత్యేక చర్యలు తీసుకోవాలి.

మహిళల రక్షణ కోసం షీటీమ్స్‌ పర్యవేక్షణ, అవసరమైన ప్రాంతాల్లో సీసీటీవీ కెమెరాల ఏర్పాటు, రద్దీని నియంత్రించేందుకు తగిన సిబ్బందిని నియమించడం వంటి చర్యలు చేపట్టాలని ప్రజలు కోరుతున్నారు. పండుగకు ముందే సంబంధిత అధికారులు క్షేత్రస్థాయిలో పర్యటించి అవసరమైన సౌకర్యాలను కల్పించాలని విజ్ఞప్తి చేస్తున్నారు.

18న సద్దుల బతుకమ్మ

బతుకమ్మ వేడుకల్లో చివరి రోజైన ఈ నెల 18న సద్దుల బతుకమ్మ సంబరాలు జరగనున్నాయి. ఈ సందర్భంగా మహిళలు పెద్ద సంఖ్యలో పాల్గొని బతుకమ్మలను పేర్చి, సంప్రదాయ పాటలు పాడుతూ వేడుకలను ఘనంగా నిర్వహించనున్నారు. జిల్లా వ్యాప్తంగా సద్దుల బతుకమ్మను వైభవంగా జరుపుకునేందుకు ఆడపడుచులు సిద్ధమవుతున్నారు.

పండుగకు వచ్చే మహిళలు, చిన్నారులకు ఎలాంటి ఇబ్బందులు కలగకుండా అధికారులు ముందస్తు చర్యలు చేపట్టాలని ప్రజలు కోరుతున్నారు. తెలంగాణ సంస్కృతి, సంప్రదాయాలను ప్రతిబింబించే బతుకమ్మ వేడుకలు ఆనందోత్సాహాల మధ్య సురక్షితంగా జరిగేలా సంబంధిత శాఖలు సమన్వయంతో పనిచేయాల్సిన అవసరం ఉంది.