కుటుంబ కలహాల నేపథ్యంలో వ్యక్తి మృతి
ఇస్లాంపూర్‌లో ఘటన.. భార్య, కుమారుడిపై కేసు నమోదు చేసి దర్యాప్తు
తూప్రాన్, సెప్టెంబర్ 19 (తెలుగు ట్రెండ్స్):
తూప్రాన్ పోలీస్ స్టేషన్ పరిధిలోని ఇస్లాంపూర్ గ్రామంలో శుక్రవారం రాత్రి హత్య ఘటన చోటుచేసుకుంది. గ్రామానికి చెందిన కొండాపురం శ్రీరాములు (50) తీవ్ర గాయాలతో మృతి చెందారు. రాత్రి సుమారు 10 గంటల సమయంలో ఈ ఘటన జరిగినట్లు పోలీసులు తెలిపారు.
పోలీసుల ప్రాథమిక విచారణ ప్రకారం.. శ్రీరాములు మద్యం సేవించి ఇంటికి వచ్చి భార్య, పిల్లలతో గొడవకు దిగినట్లు తెలుస్తోంది. ఈ క్రమంలో కుటుంబ సభ్యులపై దాడికి పాల్పడటంతో పాటు గ్యాస్ సిలిండర్‌ను విడుదల చేసి చంపుతానని బెదిరించినట్లు పోలీసులు తెలిపారు.
దీంతో ఇంట్లో ఘర్షణ చోటుచేసుకోగా.. శ్రీరాములుపై భార్య సబిత, కుమారుడు భరత్ కర్రతో దాడి చేసినట్లు ప్రాథమికంగా పోలీసులు గుర్తించారు. ఈ దాడిలో శ్రీరాములు తలకు తీవ్ర గాయాలు కావడంతో అక్కడికక్కడే మృతి చెందినట్లు సమాచారం.
సంఘటనా స్థలాన్ని పరిశీలించిన పోలీసులు
ఘటనపై సమాచారం అందుకున్న వెంటనే ఎస్‌ఐలు గంగరాజు, జ్యోతి సిబ్బందితో కలిసి సంఘటనా స్థలానికి చేరుకుని పరిస్థితిని పరిశీలించారు. అనంతరం తూప్రాన్ సీఐ వెంకటరాజ గౌడ్, డీఎస్పీ నరేందర్ గౌడ్ కూడా సంఘటనా స్థలాన్ని పరిశీలించి వివరాలు సేకరించారు.
మృతదేహాన్ని పోస్టుమార్టం నిమిత్తం తూప్రాన్ ప్రభుత్వ ఆసుపత్రి మార్చురీకి తరలించారు. ఘటనకు సంబంధించి పోలీసులు కేసు నమోదు చేసి దర్యాప్తు చేపట్టారు.
కుటుంబంలో కొంతకాలంగా కొనసాగుతున్న విభేదాలే ఘటనకు కారణమా? లేక మరేదైనా కారణం ఉందా? అనే కోణంలో పోలీసులు విచారణ చేస్తున్నారు. పూర్తి దర్యాప్తు అనంతరం ఘటనకు సంబంధించిన మరిన్ని వివరాలు వెల్లడయ్యే అవకాశం ఉంది.
