గడ్డి కోస్తుండగా కరెంట్ షాక్.. యువ రైతు మృతి!
విద్యుత్ వైరు తెగిపడటంతో విషాదం.. షేరిలాలో విషాదఛాయలు
వెల్దుర్తి, సెప్టెంబర్ 6 (తెలుగు ట్రెండ్స్ – వెల్దుర్తి):
గడ్డి కోస్తుండగా విద్యుత్ షాక్‌కు గురై ఓ యువ రైతు మృతిచెందిన విషాద ఘటన వెల్దుర్తి మండల పరిధిలోని షేరిలా గ్రామంలో ఆదివారం చోటుచేసుకుంది. గ్రామానికి చెందిన మిర్జపల్లి రఘుపతి (28) వ్యవసాయ కూలీ పనికి వెళ్లి ప్రమాదవశాత్తు విద్యుత్ షాక్‌కు గురై అక్కడికక్కడే మృతిచెందారు.
గ్రామస్థులు తెలిపిన వివరాల ప్రకారం.. వెల్దుర్తి గ్రామ సమీపంలోని ఓ రైతు వ్యవసాయ పొలంలో గడ్డి ఎక్కువగా పెరగడంతో దానిని తొలగించేందుకు రఘుపతి గడ్డి కోసే యంత్రంతో పనికి వెళ్లారు. గడ్డి కోస్తున్న సమయంలో బోరు మోటార్‌కు విద్యుత్ సరఫరా చేసే వైరు ప్రమాదవశాత్తు తెగిపడినట్లు తెలిపారు. ఆ సమయంలో విద్యుత్ ప్రసరణ ఉండటంతో రఘుపతికి ఒక్కసారిగా విద్యుత్ షాక్ తగిలి తీవ్రంగా గాయపడ్డారు. ప్రమాద తీవ్రతకు ఆయన అక్కడికక్కడే ప్రాణాలు కోల్పోయినట్లు గ్రామస్థులు తెలిపారు.
ఈ విషాద ఘటనతో షేరిలా గ్రామంలో విషాదఛాయలు అలుముకున్నాయి. రఘుపతి మృతిచెందిన విషయం తెలుసుకున్న కుటుంబ సభ్యులు సంఘటనా స్థలానికి చేరుకుని కన్నీరుమున్నీరుగా విలపించారు. కుటుంబ సభ్యులు, బంధువుల రోదనలు స్థానికులను కలచివేశాయి.
మృతుడికి భార్య సునిత, ఇద్దరు కుమార్తెలు, తల్లిదండ్రులు యాదమ్మ, లక్ష్మయ్య ఉన్నారు. కుటుంబానికి అండగా ఉన్న రఘుపతి ఆకస్మికంగా మృతిచెందడంతో కుటుంబ సభ్యులు తీవ్ర విషాదంలో మునిగిపోయారు. యువకుడి మృతితో గ్రామస్థులు దిగ్భ్రాంతి వ్యక్తం చేస్తూ కుటుంబానికి ప్రగాఢ సానుభూతి తెలిపారు.
వ్యవసాయ పనులు, విద్యుత్ పరికరాల వినియోగం సమయంలో రైతులు, కూలీలు అప్రమత్తంగా ఉండాలని స్థానికులు సూచిస్తున్నారు. విద్యుత్ వైర్లు, మోటార్లు, ఇతర విద్యుత్ పరికరాల విషయంలో ముందస్తు జాగ్రత్తలు తీసుకోవాల్సిన అవసరం ఉందని పేర్కొన్నారు.
