బీసీ కులగణన చేపట్టాలి.. జనగణనలో ఓబీసీలకు ప్రత్యేక కాలమ్ ఏర్పాటు చేయాలి
పోరుబాటతో ఉద్యమాలు చేపడతాం.. బీసీ సంక్షేమ సంఘం మెదక్ జిల్లా గౌరవ అధ్యక్షుడు మెట్టు గంగారం
రామాయంపేట, సెప్టెంబర్ 25 (తెలుగు ట్రెండ్స్): దేశవ్యాప్తంగా నిర్వహిస్తున్న జనాభా లెక్కల్లో ఓబీసీలకు ప్రత్యేక కాలమ్ ఏర్పాటు చేసి బీసీ కులగణన చేపట్టే వరకు తమ పోరాటం ఆగదని బీసీ సంక్షేమ సంఘం మెదక్ జిల్లా గౌరవ అధ్యక్షుడు మెట్టు గంగారం అన్నారు. శుక్రవారం రామాయంపేటలోని బీసీ భవన్‌లో నిర్వహించిన సమావేశంలో ఆయన మాట్లాడారు.
దేశ జనాభాలో 50 శాతానికి పైగా ఉన్న బీసీలకు కులగణన లేకపోవడం వల్ల అనేక విధాలుగా అన్యాయం జరుగుతోందని మెట్టు గంగారం అన్నారు. బీసీల జనాభా, సామాజిక, ఆర్థిక పరిస్థితులపై స్పష్టమైన గణాంకాలు ఉంటేనే వారి హక్కులు, సంక్షేమ పథకాలు, రిజర్వేషన్లకు సంబంధించిన విధానాలను సమర్థవంతంగా రూపొందించే అవకాశం ఉంటుందని పేర్కొన్నారు.
బీసీల సంక్షేమంపై రాజకీయ పార్టీలు నిర్లక్ష్యం వహిస్తే రాబోయే ఎన్నికల్లో ప్రజల నుంచి తగిన సమాధానం ఎదుర్కోవాల్సి వస్తుందని ఆయన అన్నారు. తెలంగాణ అసెంబ్లీ వర్షాకాల సమావేశాల్లో ఓబీసీ కాలమ్ ఏర్పాటు చేయాలని చేసిన తీర్మానాన్ని బీజేపీ శాసనసభాపక్ష నేతలు వ్యతిరేకిస్తూ వాకౌట్ చేయడం బీసీలకు అన్యాయం చేయడమేనని విమర్శించారు.
బీసీ కులగణన సాధన కోసం గల్లీ నుంచి ఢిల్లీ వరకు ఉద్యమాన్ని కొనసాగిస్తామని మెట్టు గంగారం తెలిపారు. ఇందులో భాగంగా అక్టోబర్ 4న పాలమూరు నుంచి బీసీ కులగణన గర్జన కార్యక్రమాన్ని నిర్వహించనున్నట్లు వెల్లడించారు. అనంతరం అక్టోబర్ 8న ఢిల్లీలో అఖిలపక్ష సమావేశంతో పాటు మేధావులు, ప్రొఫెసర్లతో ప్రత్యేక సమావేశం నిర్వహించనున్నట్లు తెలిపారు.
కేంద్ర ప్రభుత్వం వెంటనే స్పందించి జనగణనలో ఓబీసీలకు ప్రత్యేక కాలమ్ ఏర్పాటు చేయాలని ఆయన డిమాండ్ చేశారు. బీసీ కులగణనపై స్పష్టమైన నిర్ణయం తీసుకోకపోతే దేశవ్యాప్తంగా ఉద్యమాన్ని మరింత ఉధృతం చేస్తామని మెట్టు గంగారం హెచ్చరించారు.
ఈ కార్యక్రమంలో బీసీ సంక్షేమ సంఘం మెదక్ నియోజకవర్గ కన్వీనర్ మామిడి సిద్ధారాములు, రామాయంపేట మండల అధ్యక్షుడు ఉడుత రాజేష్ తదితరులు పాల్గొన్నారు.
