నిమజ్జన ఏర్పాట్లను పరిశీలించిన మెదక్ జిల్లా అదనపు ఎస్పీ విక్రాంత్ కుమార్ సింగ్ ఐపీఎస్
రామాయంపేట, తెలుగు ట్రెండ్స్:
గణేష్ నిమజ్జన కార్యక్రమాన్ని ప్రశాంతంగా, ఎలాంటి అవాంఛనీయ ఘటనలకు తావులేకుండా నిర్వహించేందుకు పోలీసులు పటిష్టమైన భద్రతా ఏర్పాట్లు చేపట్టారు. ఈ నేపథ్యంలో మెదక్ జిల్లా అదనపు ఎస్పీ విక్రాంత్ కుమార్ సింగ్ ఐపీఎస్ శనివారం రాత్రి రామాయంపేట పట్టణంలో పర్యటించి నిమజ్జన ఏర్పాట్లను క్షేత్రస్థాయిలో పరిశీలించారు.
రామాయంపేటలో శనివారం రాత్రి నుంచి ఆదివారం మధ్యాహ్నం వరకు కొనసాగనున్న గణేష్ నిమజ్జన కార్యక్రమాల సందర్భంగా శోభాయాత్ర సాగే ప్రధాన మార్గాలను అదనపు ఎస్పీ పరిశీలించారు. శోభాయాత్రలో గణేష్ విగ్రహాలు తరలించే సమయంలో ఎలాంటి ఇబ్బందులు తలెత్తకుండా రహదారుల పరిస్థితి, ట్రాఫిక్ నియంత్రణ, బందోబస్తు ఏర్పాట్లపై పోలీసు అధికారులతో చర్చించారు.
అనంతరం నిమజ్జన ప్రదేశాన్ని సందర్శించిన అదనపు ఎస్పీ అక్కడ ఏర్పాటు చేసిన భద్రతా చర్యలను సమీక్షించారు. నిమజ్జనానికి వచ్చే భక్తులు, ప్రజలకు ఎలాంటి ఇబ్బందులు కలగకుండా తగిన ఏర్పాట్లు చేయాలని అధికారులకు సూచించారు. నిమజ్జన ప్రదేశంలో ప్రమాదాలకు అవకాశం లేకుండా భద్రతా ప్రమాణాలను కచ్చితంగా పాటించాలని, అవసరమైన చోట పోలీసు సిబ్బందిని మోహరించాలని ఆదేశించారు.
శోభాయాత్ర సమయంలో ట్రాఫిక్‌కు అంతరాయం కలగకుండా ముందస్తు చర్యలు చేపట్టాలని, ప్రధాన కూడళ్ల వద్ద ట్రాఫిక్ నియంత్రణపై ప్రత్యేక దృష్టి సారించాలని సూచించారు. శోభాయాత్ర మార్గంలో విద్యుత్, రహదారి, పార్కింగ్ తదితర అంశాలపై కూడా అప్రమత్తంగా ఉండాలని అధికారులకు తెలిపారు.
గణేష్ నిమజ్జన కార్యక్రమం సందర్భంగా ప్రజలు పోలీసులకు సహకరించాలని, నిబంధనలు పాటిస్తూ శాంతియుత వాతావరణంలో వేడుకలను నిర్వహించుకోవాలని అదనపు ఎస్పీ కోరారు. ఏవైనా సమస్యలు తలెత్తితే వెంటనే పోలీసుల దృష్టికి తీసుకురావాలని సూచించారు.
నిమజ్జన కార్యక్రమం సజావుగా పూర్తయ్యేలా పోలీసు అధికారులు, సిబ్బంది సమన్వయంతో విధులు నిర్వహించాలని, శాంతిభద్రతలకు ఎలాంటి విఘాతం కలగకుండా నిరంతరం అప్రమత్తంగా ఉండాలని అదనపు ఎస్పీ ఆదేశించారు.
ఈ కార్యక్రమంలో అదనపు ఎస్పీ వెంట డీఎస్పీ నరేందర్ గౌడ్, సీఐ సైదా, ఎస్‌ఐ బాలరాజుతో పాటు పోలీసు సిబ్బంది పాల్గొన్నారు.
