ప్రజల పోరాటాల ఫలితమే తెలంగాణ విమోచనం
కొల్చారం, సెప్టెంబర్ 17 (తెలుగు ట్రేండ్స్):
భారతదేశానికి 1947 ఆగస్టు 15న బ్రిటిష్ పాలన నుంచి స్వాతంత్ర్యం లభించినప్పటికీ హైదరాబాద్ సంస్థానంలో నిజాం పాలన కొనసాగిందని కొల్చారం తహసీల్దార్ శ్రీనివాస్ చారి తెలిపారు. ప్రజల ఉద్యమాలు, పోరాటాల ఫలితంగానే 1948 సెప్టెంబర్ 17న హైదరాబాద్ సంస్థానం భారతదేశంలో విలీనమై తెలంగాణ ప్రాంతానికి విముక్తి లభించిందని ఆయన పేర్కొన్నారు.
తెలంగాణ విమోచన దినోత్సవాన్ని పురస్కరించుకుని గురువారం కొల్చారం తహసీల్దార్ కార్యాలయం ఎదుట నిర్వహించిన కార్యక్రమంలో తహసీల్దార్ శ్రీనివాస్ చారి జాతీయ జెండాను ఆవిష్కరించారు. అనంతరం జెండాకు వందనం చేసి తెలంగాణ విమోచన దినోత్సవ ప్రాధాన్యతను వివరించారు.
ఈ సందర్భంగా తహసీల్దార్ మాట్లాడుతూ.. నిజాం పాలనలో ప్రజలు అనేక ఇబ్బందులు ఎదుర్కొన్నారని తెలిపారు. స్వేచ్ఛ, హక్కుల కోసం ప్రజలు సాగించిన ఉద్యమాలు చరిత్రలో ప్రత్యేక స్థానాన్ని సంపాదించుకున్నాయని పేర్కొన్నారు. ప్రజల పోరాటాలు, ఉద్యమాలు, కేంద్ర ప్రభుత్వ చర్యల ఫలితంగా హైదరాబాద్ సంస్థానం భారత యూనియన్‌లో విలీనమైందని వివరించారు.
ఈ చారిత్రక ఘట్టాన్ని స్మరించుకుంటూ తెలంగాణ విమోచన దినోత్సవాన్ని నిర్వహిస్తున్నామని శ్రీనివాస్ చారి తెలిపారు. నేటి తరం యువత తెలంగాణ చరిత్ర, స్వాతంత్ర్య పోరాటాలు, ప్రజా ఉద్యమాల గురించి తెలుసుకోవాలని సూచించారు. దేశ సమైక్యత, ప్రజాస్వామ్య విలువలను కాపాడుకోవాల్సిన బాధ్యత ప్రతి ఒక్కరిపై ఉందన్నారు.
తెలంగాణ రాష్ట్ర ప్రజలందరూ సుఖసంతోషాలతో, పాడిపంటలతో సుభిక్షంగా ఉండాలని తహసీల్దార్ ఆకాంక్షించారు. ప్రజలందరూ ఐక్యతతో ముందుకు సాగుతూ అభివృద్ధిలో భాగస్వాములు కావాలని కోరారు.
