ఫైజాబాద్‌లో భూభారతి రీసర్వేపై అవగాహన సదస్సు

 

ఫైజాబాద్‌లో భూభారతి భూముల రీసర్వేపై గ్రామసభ

257.16 ఎకరాల్లో రీసర్వేకు సన్నాహాలు.. రైతులకు అవగాహన కల్పించిన రెవెన్యూ అధికారులు

తెలుగు ట్రెండ్స్, చిలిపిచెడ్, అక్టోబర్ 15: తెలంగాణ ప్రభుత్వం ప్రతిష్ఠాత్మకంగా చేపట్టిన భూభారతి భూముల రీసర్వే కార్యక్రమంలో భాగంగా మెదక్ జిల్లా చిలిపిచెడ్ మండలం ఫైజాబాద్ గ్రామపంచాయతీ పరిధిలోని శేరి ఫైజాబాద్ రెవెన్యూ గ్రామంలో గ్రామసభ అవగాహన సదస్సు నిర్వహించారు. గ్రామ పరిధిలో మొత్తం 257.16 ఎకరాల విస్తీర్ణంలో చేపట్టనున్న భూముల రీసర్వేపై రైతులకు, గ్రామ ప్రజలకు అధికారులు వివరంగా అవగాహన కల్పించారు.

ఈ కార్యక్రమానికి ముఖ్య అతిథిగా హాజరైన ఆర్డీవో మాట్లాడుతూ, ప్రతి సర్వే నంబర్‌కు స్పష్టమైన భూ హద్దులను నిర్ణయించి, భూ వివాదాలకు పరిష్కారం చూపడమే భూభారతి రీసర్వే కార్యక్రమం ప్రధాన లక్ష్యమని తెలిపారు. భూములకు సంబంధించిన వివరాలను కచ్చితంగా నమోదు చేయడం, భూ హద్దుల విషయంలో భవిష్యత్తులో సమస్యలు తలెత్తకుండా చూడటం ఈ ప్రక్రియ ఉద్దేశమని వివరించారు.

భూ హద్దుల గుర్తింపునకు రైతులు సహకరించాలి

రీసర్వే ప్రక్రియలో రైతులు తమ భూముల వద్ద అందుబాటులో ఉండి, సంబంధిత భూ హద్దులను అధికారులకు చూపించాలని ఆర్డీవో సూచించారు. భూములకు సంబంధించిన పత్రాలు, సర్వే నంబర్లు, ఇతర వివరాలను సిద్ధంగా ఉంచుకోవాలని కోరారు. రీసర్వే సజావుగా పూర్తయ్యేందుకు రైతులు రెవెన్యూ, సర్వే శాఖ అధికారులకు సహకరించాలని తెలిపారు.

అధికారుల సమక్షంలో గ్రామసభ

గ్రామసభలో భూభారతి రీసర్వే ప్రక్రియ, భూ హద్దుల గుర్తింపు, రైతులు తీసుకోవాల్సిన జాగ్రత్తలు తదితర అంశాలపై అధికారులు అవగాహన కల్పించారు. రైతులు తమ భూములకు సంబంధించిన సందేహాలను అధికారుల దృష్టికి తీసుకువచ్చి, అవసరమైన వివరాలను తెలుసుకోవాలని సూచించారు.

ఈ కార్యక్రమంలో ఆర్డీవో, ఎంపీడీవో, అసిస్టెంట్ డైరెక్టర్ ల్యాండ్ సర్వేయర్, ఏడీ, డీఏ, డీఐ, ఆర్‌ఐ శ్రీహరి, సర్వేయర్లు, మండల పోలీసు శాఖ అధికారులు, జీపీ ఓ, పంచాయతీ కార్యదర్శి నాగరాజు, సర్పంచ్ తాళ్ల రాములు, ఉపసర్పంచ్ శ్రీకాంత్ రెడ్డి, వార్డు సభ్యులు, గ్రామ రైతులు, ప్రజలు పెద్ద సంఖ్యలో పాల్గొన్నారు.