జిల్లా కలెక్టర్ ప్రతీక్ జైన్‌కు జర్నలిస్టుల జన్మదిన శుభాకాంక్షలు
ప్రజా పాలన మరింత మెరుగ్గా సాగాలి.. పేదల సమస్యలు పరిష్కరించాలి
తెలుగు ట్రెండ్స్, అందోలు ప్రతినిధి:
సంగారెడ్డి జిల్లాలో ప్రజా పాలన మరింత మెరుగ్గా కొనసాగాలని, పేదలు, బడుగు బలహీన వర్గాల ప్రజల సమస్యలు పరిష్కారమయ్యేలా అధికారులు కృషి చేయాలని టీయూడబ్ల్యూజే (ఐజేయు) జర్నలిస్టులు ఆకాంక్షించారు. జిల్లా కలెక్టర్ ప్రతీక్ జైన్ ప్రజలకు మరిన్ని సేవలు అందిస్తూ, జిల్లాను అభివృద్ధి పథంలో ముందుకు నడిపించాలని కోరారు.
ఈ సందర్భంగా శనివారం టీయూడబ్ల్యూజే (ఐజేయు) సంగారెడ్డి జిల్లా అధ్యక్షుడు బండారు యాదగిరి ఆధ్వర్యంలో జర్నలిస్టుల బృందం జిల్లా కలెక్టర్ క్యాంపు కార్యాలయంలో ప్రతీక్ జైన్‌ను మర్యాదపూర్వకంగా కలిసింది. ఆయనకు జన్మదిన శుభాకాంక్షలు తెలిపి, పుస్తకాలు, పెన్నులను బహూకరించింది. కలెక్టర్ ఆయురారోగ్యాలతో, సుఖసంతోషాలతో జీవిస్తూ ప్రజలకు మరిన్ని సేవలు అందించాలని ఆకాంక్షించింది.
పేదలకు అండగా నిలవాలి
సమాజంలో అండదండలు లేని పేద ప్రజలకు జిల్లా కలెక్టర్ పెద్దదిక్కుగా నిలవాలని జర్నలిస్టులు కోరారు. ప్రజా సమస్యల పరిష్కారానికి ప్రత్యేక శ్రద్ధ చూపుతూ, ప్రభుత్వ సంక్షేమ పథకాలు అర్హులైన ప్రతి ఒక్కరికీ అందేలా చర్యలు తీసుకోవాలని విజ్ఞప్తి చేశారు. ప్రజలకు మెరుగైన సేవలు అందించడంలో జిల్లా యంత్రాంగం మరింత చురుగ్గా పనిచేయాలని పేర్కొన్నారు.
జర్నలిస్టుల సమస్యలను పరిష్కరించాలి
జిల్లాలో జర్నలిస్టులు ఎదుర్కొంటున్న సమస్యల పరిష్కారానికి జిల్లా కలెక్టర్ సహకరించాలని టీయూడబ్ల్యూజే (ఐజేయు) జిల్లా అధ్యక్షుడు బండారు యాదగిరి కోరారు. ప్రజలకు, ప్రభుత్వానికి మధ్య వారధిగా పనిచేస్తున్న జర్నలిస్టుల సంక్షేమానికి ప్రాధాన్యత ఇవ్వాలని విజ్ఞప్తి చేశారు. జర్నలిస్టుల సమస్యలను పరిష్కరించేందుకు అవసరమైన సహకారం అందించాలని కోరారు.
జర్నలిస్టుల విజ్ఞప్తిపై జిల్లా కలెక్టర్ ప్రతీక్ జైన్ మనస్ఫూర్తిగా స్పందించినట్లు వారు తెలిపారు. ప్రజా సమస్యలను వెలుగులోకి తీసుకురావడంలో జర్నలిస్టుల పాత్ర కీలకమని పేర్కొంటూ, ప్రజలకు మెరుగైన పాలన అందించాలనే ఆకాంక్షను ఈ సందర్భంగా జర్నలిస్టులు వ్యక్తం చేశారు.
ఈ కార్యక్రమంలో టీయూడబ్ల్యూజే (ఐజేయు) జిల్లా ఉపాధ్యక్షుడు మతిన్, సీనియర్ జర్నలిస్టు మసూద్, జిల్లా ఆర్గనైజింగ్ సెక్రటరీ విల్సన్, చిన్న మధ్యతరహా పత్రికల సంఘం జిల్లా అధ్యక్షుడు సిద్ధిక్ అహ్మద్, ప్రధాన కార్యదర్శి ఈశ్వర్ చవాన్, కోశాధికారి లక్ష్మణ్, ఫోటో జర్నలిస్టుల సంఘం అధ్యక్షుడు ఆరిఫ్, జర్నలిస్టులు సూర్య వెంకట్, దినేష్ నాయక్ తదితరులు పాల్గొన్నారు.
