మాడాపూర్‌లో కంది సాగుపై రైతులకు అవగాహన
పంటల వైవిధ్యీకరణతో రైతులకు ప్రయోజనాలు: వ్యవసాయ అధికారులు
నర్సాపూర్, సెప్టెంబర్ 19 (తెలుగు ట్రెండ్స్):
నర్సాపూర్ మండల పరిధిలోని మాడాపూర్ గ్రామంలో కంది సాగుపై రైతులకు వ్యవసాయ శాఖ అధికారులు అవగాహన కల్పించారు. గ్రామానికి చెందిన రైతు కిష్టయ్య ఐదు ఎకరాల్లో సాగు చేస్తున్న కంది పంటను వ్యవసాయ శాఖ అధికారులు, స్థానిక రైతులతో కలిసి పరిశీలించారు.
ఈ సందర్భంగా సహాయ వ్యవసాయ సంచాలకులు సంధ్యారాణి మాట్లాడుతూ.. రైతులు వరి పంటపై అధికంగా ఆధారపడటాన్ని తగ్గించి పంటల వైవిధ్యీకరణను పాటించాలని సూచించారు. భూమి స్వభావం, నేల ఆరోగ్యం, నీటి లభ్యత, మార్కెట్ పరిస్థితులను పరిగణనలోకి తీసుకుని కంది వంటి పప్పుధాన్యాలను ప్రత్యామ్నాయ పంటలుగా సాగు చేయాలని తెలిపారు.
కంది వంటి పప్పుధాన్యాల సాగు ద్వారా పంటల మార్పిడికి అవకాశం లభించడంతో పాటు నేల ఆరోగ్యాన్ని కాపాడుకోవడంలో కూడా ప్రయోజనం ఉంటుందని అధికారులు వివరించారు. స్థానిక పరిస్థితులకు అనుగుణంగా పంటను ఎంపిక చేసుకోవడం ద్వారా రైతులు సాగు విధానాన్ని మరింత సమర్థవంతంగా నిర్వహించుకోవచ్చని సూచించారు.
కంది పంటను పరిశీలించిన అధికారులు
కంది పంటను పరిశీలించిన వ్యవసాయ అధికారులు పంట ప్రస్తుత పరిస్థితి, సాగు విధానం, పంట నిర్వహణ తదితర అంశాలను రైతు కిష్టయ్యను అడిగి తెలుసుకున్నారు. పంటలో ఎదురయ్యే సమస్యలు, తీసుకోవాల్సిన జాగ్రత్తలపై రైతులకు సూచనలు అందించారు.
రైతులు కూడా కంది సాగుకు సంబంధించిన పలు అంశాలను అధికారులను అడిగి తెలుసుకున్నారు. తమ సందేహాలను నివృత్తి చేసుకునేందుకు వ్యవసాయ శాఖ అధికారులతో చర్చించారు.
ఈ కార్యక్రమంలో మండల వ్యవసాయ అధికారిణి దీపిక, ఏఈవోలు మోహన్, లావణ్య, ఏటీఎం హరీష్, గ్రామ రైతులు తదితరులు పాల్గొన్నారు.
