యువత స్వయం ఉపాధిలో రాణించాలి
బీఆర్‌ఎస్ జిల్లా నాయకులు లక్ష్మణ్ సింగ్
మనోహరాబాద్, సెప్టెంబర్ 20 (తెలుగు ట్రెండ్స్):
యువత ఉద్యోగాల కోసం ఎదురుచూడకుండా స్వయం ఉపాధి అవకాశాలను సద్వినియోగం చేసుకుని ఆర్థికంగా అభివృద్ధి సాధించాలని బీఆర్‌ఎస్ జిల్లా నాయకులు లక్ష్మణ్ సింగ్ అన్నారు. స్వయం ఉపాధి ద్వారా యువతతో పాటు గ్రామీణ ప్రాంతాల్లోని కుటుంబాలు కూడా ఆర్థికంగా బలోపేతం కావచ్చని పేర్కొన్నారు.
మనోహరాబాద్ మండలం తుపాకులపల్లి గ్రామంలో ఆదివారం నూతనంగా ఏర్పాటు చేసిన పాలకేంద్రాన్ని ఉప సర్పంచ్ మహేష్ యాదవ్తో కలిసి లక్ష్మణ్ సింగ్ ప్రారంభించారు. ఈ సందర్భంగా పాలకేంద్రం నిర్వాహకులకు అభినందనలు తెలిపారు.
అనంతరం ఆయన మాట్లాడుతూ.. ప్రస్తుతం యువతలో అనేక రకాల ప్రతిభ, నైపుణ్యాలు ఉన్నాయని, వాటిని ఉపయోగించుకుని సొంతంగా వ్యాపారాలు ప్రారంభించాలని సూచించారు. ప్రభుత్వం, వివిధ సంస్థలు అందిస్తున్న స్వయం ఉపాధి అవకాశాలను గుర్తించి వాటిని సద్వినియోగం చేసుకోవాలని అన్నారు. ఉద్యోగం కోసం మాత్రమే ఎదురుచూడకుండా చిన్న వ్యాపారంతో ప్రారంభించి క్రమంగా అభివృద్ధి సాధించాలని యువతకు సూచించారు.
గ్రామీణ ప్రాంతాల్లో పాలకేంద్రాలు ఏర్పాటు చేయడం వల్ల రైతులకు, పాడి పరిశ్రమపై ఆధారపడే కుటుంబాలకు కూడా ప్రయోజనం కలుగుతుందని పేర్కొన్నారు. స్థానికంగా ఉపాధి అవకాశాలు పెరగడంతో పాటు ప్రజలకు అవసరమైన సేవలు అందుబాటులోకి వస్తాయని తెలిపారు.
ఈ కార్యక్రమంలో గ్రామానికి చెందిన రైతులు, యువత పాల్గొన్నారు. నూతన పాలకేంద్రం ఏర్పాటుతో స్థానికంగా ప్రజలకు మరింత సౌకర్యం కలుగుతుందని గ్రామస్తు
లు తెలిపారు.
