పాపన్నపేటలో పద్మశాలీల ఆధ్వర్యంలో ఘనంగా పూజా కార్యక్రమాలు
ఆఖరి శ్రావణ సోమవారం సందర్భంగా గోపాల కాల్వల పూజలు.. శివుడు, ఆంజనేయస్వామికి ప్రత్యేక అభిషేకాలు
పాపన్నపేట, సెప్టెంబర్ 7 (తెలుగు ట్రెండ్స్): ఆఖరి శ్రావణ సోమవారం సందర్భంగా పాపన్నపేట మండల కేంద్రంలో పద్మశాలి కులసంఘం ఆధ్వర్యంలో ప్రత్యేక పూజా కార్యక్రమాలు భక్తిశ్రద్ధలతో ఘనంగా నిర్వహించారు. గోపాల కాల్వల కార్యక్రమంతో పాటు శివుడు, ఆంజనేయస్వామికి ప్రత్యేక అభిషేకాలు, పూజలు నిర్వహించడంతో ఆలయాలు భక్తులతో సందడిగా మారాయి.
ఈశ్వరాలయం ప్రధాన అర్చకులు చెరువుపల్లి విశ్వనాథ శర్మ ఆధ్వర్యంలో ఉదయాన్నే పద్మశాలి కులస్థులు లింగాభిషేకం, పత్రపూజ, ఆంజనేయస్వామికి ప్రత్యేక పూజలు, నవగ్రహ దేవతా పూజలను భక్తిశ్రద్ధలతో నిర్వహించారు. కుటుంబ సభ్యులతో కలిసి భక్తులు స్వామివారిని దర్శించుకుని ప్రత్యేక పూజల్లో పాల్గొన్నారు.
అనంతరం గ్రామంలోని వివిధ ఆలయాలు, ప్రధాన కూడళ్ల వద్ద ఉట్టి కొట్టే కార్యక్రమాన్ని ఉత్సాహంగా నిర్వహించారు. ఈ వేడుకల్లో పద్మశాలి కులస్థులు, పెద్దలు, యువకులు, చిన్నారులు, మహిళలు పెద్ద సంఖ్యలో పాల్గొని సందడి చేశారు. ఉట్టి కొట్టే కార్యక్రమంతో గ్రామంలో పండుగ వాతావరణం నెలకొంది.
ఘనంగా అన్నసంతర్పణ
పూజా కార్యక్రమాల అనంతరం పద్మశాలి కులదైవం ఆధ్వర్యంలో గ్రామస్థులకు అన్నసంతర్పణ కార్యక్రమం నిర్వహించారు. భక్తులు, గ్రామస్థులు పెద్ద సంఖ్యలో పాల్గొని అన్నప్రసాదాన్ని స్వీకరించారు.
ఈ సందర్భంగా పద్మశాలి కులదైవం పెద్దలు మాట్లాడుతూ.. ప్రతి సంవత్సరం శ్రావణ మాసంలో నిర్వహించే ఆధ్యాత్మిక కార్యక్రమాలను భక్తిశ్రద్ధలతో కొనసాగించడం ఆనందంగా ఉందన్నారు. గ్రామ ప్రజలందరూ సుఖసంతోషాలతో, ఆయురారోగ్యాలతో ఉండాలని స్వామివారిని ప్రార్థించినట్లు తెలిపారు.
కార్యక్రమంలో పద్మశాలి కులదైవం పెద్దలు, కులస్థులు, మహిళలు, యువకులు, చిన్నారులు అధిక సంఖ్యలో పాల్గొన్నారు. ఆఖరి శ్రావణ సోమవారం సందర్భంగా నిర్వహించిన ప్రత్యేక పూజలు, ఉట్టి కొట్టే వేడుకలు, అన్నసంతర్పణతో పాపన్నపేటలో ఆధ్యాత్మిక సందడి నెలకొంది.
