మంబోజిపల్లి మల్లన్న స్వామి సేవలో భక్తులు
చివరి శ్రావణ శనివారం సందర్భంగా ప్రత్యేక పూజలు.. భక్తులకు అన్నదానం
మెదక్, సెప్టెంబర్ 12 (తెలుగు ట్రెండ్స్):
మెదక్ మండల పరిధిలోని మంబోజిపల్లి గ్రామ శివారులో కొయ్యగుట్టపై వెలసిన శ్రీ మల్లన్న స్వామి ఆలయానికి చివరి శ్రావణ శనివారం సందర్భంగా భక్తులు అధిక సంఖ్యలో తరలివచ్చారు. ఉదయం నుంచే ఆలయ పరిసరాలు భక్తులతో సందడిగా మారాయి. భక్తులు స్వామివారిని దర్శించుకుని ప్రత్యేక పూజలు నిర్వహించి మొక్కులు చెల్లించుకున్నారు.
శ్రావణ మాసం చివరి శనివారం కావడంతో వివిధ గ్రామాల నుంచి పెద్ద సంఖ్యలో భక్తులు ఆలయానికి చేరుకున్నారు. స్వామివారికి ప్రత్యేక అభిషేకాలు, పూజా కార్యక్రమాలు నిర్వహించి భక్తిశ్రద్ధలతో సేవలు చేసుకున్నారు. ఆలయానికి వచ్చిన భక్తులకు ఎలాంటి అసౌకర్యం కలగకుండా నిర్వాహకులు ఏర్పాట్లు చేశారు.
ఈ సందర్భంగా ఆలయ వ్యవస్థాపక పూజారి శ్రీ మల్లన్న స్వామి మాట్లాడుతూ.. భక్తుల సౌకర్యార్థం ఆలయంలో ప్రత్యేక సేవా కార్యక్రమాలను నిర్వహిస్తున్నట్లు తెలిపారు. ఇకపై ప్రతి ఆదివారం అన్నదానం కార్యక్రమం నిర్వహించనున్నట్లు చెప్పారు. అలాగే ప్రతి అమావాస్య, పౌర్ణమి రోజుల్లో భక్తులకు అన్నదానం ఏర్పాటు చేయనున్నట్లు తెలిపారు.
పౌర్ణమి సందర్భంగా ఆలయంలో ప్రత్యేకంగా భజనలు, భక్తి గీతాల కార్యక్రమాలను నిర్వహించనున్నట్లు పూజారి వెల్లడించారు. భక్తులు పెద్ద సంఖ్యలో పాల్గొని స్వామివారి ఆశీస్సులు పొందాలని కోరారు.
శ్రావణ శనివారం సందర్భంగా ఆలయానికి వచ్చిన భక్తులు ప్రత్యేక పూజల్లో పాల్గొని స్వామివారిని దర్శించుకోవడంతో ఆధ్యాత్మిక వాతావరణం నెలకొంది.
