ప్రజల గళం.. పాదయాత్ర బలం!
రోడ్డు కోసం రోడ్డెక్కిన బీఆర్ఎస్
సర్కారును కదిలించేలా భారీ పాదయాత్ర.. వారం రోజుల్లో పనులు ప్రారంభించాలని డిమాండ్
వెల్దుర్తి మండలం, ఆగస్టు 31 (తెలుగు ట్రెండ్స్ న్యూస్):
గుంతలమయమైన రహదారి.. వర్షం పడితే బురద.. నిత్యం అవస్థలు పడుతున్న ప్రజలు.. అయినా ప్రభుత్వం స్పందించడం లేదంటూ బీఆర్ఎస్ శ్రేణులు ఆగ్రహం వ్యక్తం చేశాయి. వెల్దుర్తి నుంచి శెట్టిపల్లి కలాన్ మీదుగా మెదక్ వరకు బీటీ రోడ్డు నిర్మాణం చేపట్టాలని డిమాండ్ చేస్తూ నర్సాపూర్ ఎమ్మెల్యే వాకిటి సునీతా లక్ష్మారెడ్డి ఆధ్వర్యంలో సోమవారం భారీ పాదయాత్ర నిర్వహించారు.
వెల్దుర్తి నుంచి ఉప్పులింగాపూర్ వైపు సాగిన ఈ పాదయాత్రలో బీఆర్ఎస్ మెదక్ జిల్లా అధ్యక్షురాలు, మాజీ డిప్యూటీ స్పీకర్ పద్మా దేవేందర్రెడ్డి, ఎమ్మెల్సీ యాదవ్రెడ్డి, మాజీ మెదక్ జిల్లా జడ్పీ చైర్మన్ హిమాలత శేఖర్గౌడ్తో పాటు బీఆర్ఎస్ నాయకులు, కార్యకర్తలు, స్థానిక ప్రజలు పెద్ద సంఖ్యలో పాల్గొన్నారు. “వెంటనే బీటీ రోడ్డు నిర్మించాలి.. ప్రజల కష్టాలు తీర్చాలి” అంటూ నినాదాలు చేశారు.
రహదారి దుస్థితిపై ఎమ్మెల్యే ఆగ్రహం
ఈ సందర్భంగా ఎమ్మెల్యే సునీతా లక్ష్మారెడ్డి కాంగ్రెస్ ప్రభుత్వంపై తీవ్రస్థాయిలో మండిపడ్డారు. ప్రజలు నిత్యం ఇబ్బందులు పడుతుంటే ప్రభుత్వం ఎందుకు స్పందించడం లేదని ప్రశ్నించారు. రహదారి దుస్థితి ప్రభుత్వానికి కనిపించడం లేదా? ప్రజల కష్టాలు కనిపించడం లేదా? అంటూ నిలదీశారు.
వెల్దుర్తి నుంచి మెదక్ వరకు రహదారి పూర్తిగా ధ్వంసమై గుంతలమయంగా మారిందని ఆమె తెలిపారు. వర్షాలు కురిసిన సమయంలో గుంతల్లో నీరు, బురద చేరడంతో రాకపోకలు మరింత ప్రమాదకరంగా మారుతున్నాయని అన్నారు.
ఈ రహదారిపై ప్రయాణించే రైతులు, విద్యార్థులు, ఉద్యోగులు, వాహనదారులు తీవ్ర ఇబ్బందులు ఎదుర్కొంటున్నారని పేర్కొన్నారు. రోడ్డు అధ్వానంగా ఉండటంతో ఆర్టీసీ బస్సుల రాకపోకలకు కూడా ఇబ్బందులు ఏర్పడుతున్నాయని, విద్యార్థులు పాఠశాలలు, కళాశాలలకు వెళ్లేందుకు అవస్థలు పడుతున్నారని తెలిపారు.
రూ.11.68 కోట్ల నిధులపై ప్రశ్నలు
రోడ్డు నిర్మాణానికి రూ.11.68 కోట్ల నిధులు మంజూరైనప్పటికీ పనులు ఎందుకు ప్రారంభించలేదని ఎమ్మెల్యే సునీతా లక్ష్మారెడ్డి ప్రశ్నించారు. ఇప్పటికే రెండు టెండర్లు వచ్చినా పనులు చేపట్టకపోవడానికి కారణమేంటని ప్రభుత్వాన్ని నిలదీశారు.
రహదారి సమస్యను పలుమార్లు మంత్రుల దృష్టికి తీసుకెళ్లామని, అసెంబ్లీలో కూడా ఈ సమస్యను ప్రస్తావించినప్పటికీ ప్రభుత్వం స్పందించలేదని ఆమె ఆరోపించారు.
“ప్రజా సమస్యలు పరిష్కరించలేని ప్రభుత్వం ప్రజాపాలన గురించి మాట్లాడటం విడ్డూరంగా ఉంది. ప్రజల ఓట్లతో అధికారంలోకి వచ్చి ఇప్పుడు ప్రజలనే ఇబ్బందులకు గురిచేస్తున్నారు” అంటూ కాంగ్రెస్ ప్రభుత్వంపై విమర్శలు చేశారు.
ప్రజల కష్టాలను పట్టించుకోవడమేనా ప్రజాపాలన?
బీఆర్ఎస్ మెదక్ జిల్లా అధ్యక్షురాలు, మాజీ డిప్యూటీ స్పీకర్ పద్మా దేవేందర్రెడ్డి మాట్లాడుతూ.. రహదారి సమస్యతో ప్రజలు ఇబ్బందులు పడుతున్నా పట్టించుకోకపోవడమేనా ప్రజాపాలన అని ప్రశ్నించారు. వెంటనే రహదారి నిర్మాణ పనులను ప్రారంభించి ప్రజలకు ఇబ్బందులు లేకుండా చూడాలని డిమాండ్ చేశారు.
ఎమ్మెల్సీ యాదవ్రెడ్డి మాట్లాడుతూ ప్రజలకు కనీస రవాణా సౌకర్యం కల్పించడం ప్రభుత్వ బాధ్యత అని అన్నారు. ప్రభుత్వం వారం రోజుల్లో స్పందించి రోడ్డు పనులు ప్రారంభించకపోతే పెద్ద ఎత్తున ప్రజా ఉద్యమం చేపడతామని హెచ్చరించారు.
ప్రభుత్వం స్పందించే వరకు ఉద్యమాన్ని కొనసాగిస్తామని బీఆర్ఎస్ నాయకులు స్పష్టం చేశారు. రోడ్డు నిర్మాణం కోసం చేపట్టిన పాదయాత్రకు స్థానిక ప్రజల నుంచి కూడా మద్దతు లభించింది.
భారీగా పాల్గొన్న బీఆర్ఎస్ శ్రేణులు
ఈ కార్యక్రమంలో మండల పార్టీ అధ్యక్షుడు భూపాల్రెడ్డి, మాజీ జడ్పీటీసీ రమేష్గౌడ్, మెదక్ మాజీ మార్కెట్ కమిటీ వైస్ చైర్మన్ కృష్ణగౌడ్, మాజీ సర్పంచ్ మోహన్రెడ్డి, మండల సర్పంచుల ఫోరం అధ్యక్షుడు రంగి కృష్ణ, మాజీ ఆత్మ కమిటీ చైర్మన్ ప్రతాపరెడ్డి, మాజీ సర్పంచుల ఫోరం అధ్యక్షుడు అశోక్రెడ్డి, మండల పార్టీ ఉపాధ్యక్షుడు శాకారం శ్రీనివాస్గౌడ్, వెల్దుర్తి పట్టణ అధ్యక్షుడు అశోక్గౌడ్, బీఆర్ఎస్ నాయకులు పడిగ నరసింహులు తదితరులు పాల్గొన్నారు.
వివిధ గ్రామాలకు చెందిన సర్పంచులు, మాజీ సర్పంచులు, ఎంపీటీసీలు, పార్టీ నాయకులు, కార్యకర్తలు, ప్రజలు పెద్ద సంఖ్యలో పాదయాత్రలో పాల్గొన్నారు.
– తెలుగు ట్రెండ్స్ న్యూస్
