1000 రోజుల దగా.. కాంగ్రెస్‌పై కేటీఆర్‌ చార్జ్‌షీట్‌!
420 హామీలు.. 13 డిక్లరేషన్లు.. 6 గ్యారంటీల అమలు ఎక్కడ?
తెలంగాణ భవన్‌లో హరీశ్‌రావుతో కలిసి కాంగ్రెస్‌ ప్రభుత్వంపై తీవ్ర విమర్శలు.. వారం రోజుల పాటు రాష్ట్రవ్యాప్తంగా బీఆర్‌ఎస్‌ నిరసనలు
హైదరాబాద్‌, సెప్టెంబర్‌ 2 (తెలుగు ట్రెండ్స్ న్యూస్):
కాంగ్రెస్‌ ప్రభుత్వం అధికారంలోకి వచ్చి 1000 రోజులు పూర్తయిన సందర్భంగా బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ ఆ పార్టీ ప్రభుత్వంపై తీవ్రస్థాయిలో విమర్శలు గుప్పించారు. హైదరాబాద్‌లోని తెలంగాణ భవన్‌లో మాజీ మంత్రి హరీశ్‌రావుతో కలిసి నిర్వహించిన మీడియా సమావేశంలో “1000 రోజుల దగా” పేరుతో కాంగ్రెస్‌ ప్రభుత్వ వైఫల్యాలపై రూపొందించిన చార్జ్‌షీట్‌ను విడుదల చేశారు.
ఎన్నికల సమయంలో కాంగ్రెస్‌ పార్టీ ప్రజలకు ఇచ్చిన 420 హామీలు, 13 డిక్లరేషన్లు, 6 గ్యారంటీల్లో ఏ ఒక్కదానినీ పూర్తిస్థాయిలో అమలు చేయలేదని కేటీఆర్‌ ఆరోపించారు. అధికారంలోకి వచ్చిన 100 రోజుల్లోనే గ్యారంటీలన్నింటినీ అమలు చేస్తామని చెప్పిన కాంగ్రెస్‌.. 1000 రోజులు పూర్తవుతున్నా హామీలను నెరవేర్చలేకపోయిందని విమర్శించారు.
విద్యార్థుల భవిష్యత్తుతో చెలగాటం: కేటీఆర్‌
ఫీజు రీయింబర్స్‌మెంట్‌ బకాయిలు రూ.12 వేల కోట్లకు పైగా పేరుకుపోయాయని కేటీఆర్‌ ఆరోపించారు. బకాయిల కారణంగా అనేక ప్రైవేట్‌ కళాశాలలు ఆర్థిక ఇబ్బందులు ఎదుర్కొంటున్నాయని, విద్యార్థుల భవిష్యత్తు ప్రశ్నార్థకంగా మారుతోందని ఆందోళన వ్యక్తం చేశారు.
ప్రభుత్వ పాఠశాల విద్యార్థులకు పంపిణీ చేస్తున్న యూనిఫారాల నాణ్యతపై కూడా ఆయన తీవ్ర అభ్యంతరం వ్యక్తం చేశారు. నాణ్యత లేని వస్త్రాలతో యూనిఫారాలు అందిస్తున్నారనే ఆరోపణలపై ప్రభుత్వం వెంటనే విచారణ చేపట్టాలని డిమాండ్‌ చేశారు.
రైతులు, యువతకు అన్యాయం
రైతులందరికీ ఏకకాలంలో రుణమాఫీ చేస్తామని హామీ ఇచ్చి.. పూర్తిస్థాయిలో అమలు చేయకుండా ప్రభుత్వం రైతులను మోసం చేసిందని కేటీఆర్‌ విమర్శించారు. రైతుబంధు, రైతు సమస్యలు, వ్యవసాయ రంగానికి సంబంధించిన అంశాల్లోనూ ప్రభుత్వం విఫలమైందని ఆరోపించారు.
నిరుద్యోగ యువతకు ఉద్యోగాల కల్పన, జాబ్‌ క్యాలెండర్‌ విషయంలోనూ కాంగ్రెస్‌ ప్రభుత్వం ఇచ్చిన మాటను నిలబెట్టుకోలేదని మండిపడ్డారు. ఉద్యోగాల కోసం ఎదురుచూస్తున్న యువతకు స్పష్టమైన కార్యాచరణ చూపాలని డిమాండ్‌ చేశారు.
రేవంత్‌రెడ్డిపై కేటీఆర్‌ ఘాటు వ్యాఖ్యలు
ముఖ్యమంత్రి రేవంత్‌రెడ్డిపై కేటీఆర్‌ తీవ్ర రాజకీయ విమర్శలు చేశారు. తెలంగాణ ప్రయోజనాలను కాపాడాల్సిన ముఖ్యమంత్రి.. పక్క రాష్ట్ర ముఖ్యమంత్రి చంద్రబాబు నాయుడికి చెంచాగిరి చేస్తున్నారని ఆరోపించారు. నదీ జలాల పంపిణీ విషయంలో తెలంగాణ హక్కులను ఇతరులకు తాకట్టు పెట్టే విధంగా వ్యవహరిస్తున్నారని విమర్శించారు.
వారం రోజుల పాటు బీఆర్‌ఎస్‌ నిరసనలు
కాంగ్రెస్‌ ప్రభుత్వ 1000 రోజుల పాలనలోని వైఫల్యాలను ప్రజల్లోకి తీసుకెళ్లేందుకు బీఆర్‌ఎస్‌ రాష్ట్రవ్యాప్తంగా ప్రత్యేక కార్యక్రమాలకు పిలుపునిచ్చింది. సెప్టెంబర్‌ 2 నుంచి వారం రోజుల పాటు అన్ని నియోజకవర్గాల్లో నిరసన కార్యక్రమాలు నిర్వహించడంతో పాటు వివిధ వర్గాల ప్రజలతో సమావేశాలు నిర్వహించనున్నట్లు కేటీఆర్‌ ప్రకటించారు.
కాంగ్రెస్‌ ప్రభుత్వం ఇచ్చిన హామీలను ప్రజలకు గుర్తుచేస్తూ.. వాటి అమలు పరిస్థితిని వివరిస్తామని బీఆర్‌ఎస్‌ నేతలు తెలిపారు. ప్రభుత్వ వైఫల్యాలను ప్రజల్లోకి తీసుకెళ్లి హామీల అమలుపై ఒత్తిడి తీసుకొస్తామని పేర్కొన్నా
రు.
– తెలుగు ట్రెండ్స్ న్యూస్
